لاہور میں موسلا دھار بارش سے نشیبی علاقے زیرِ آب، مزید بارشوں کی پیشگوئی

لاہور کے مال روڈ اور اس سے ملحقہ علاقوں میں تیز بارش کا سلسلہ جاری ہے، جس کے باعث شہر کے متعدد نشیبی علاقوں میں پانی جمع ہونا شروع ہو گیا ہے اور شہریوں کو آمدورفت میں مشکلات کا سامنا ہے۔

بارش کے اعداد و شمار کے مطابق گلشن راوی میں سب سے زیادہ 42.2 ملی میٹر بارش ریکارڈ کی گئی، جبکہ سمن آباد میں 41.2 ملی میٹر بارش ہوئی۔ اس کے علاوہ سگیاں میں 17.4 ملی میٹر، فرخ آباد میں 11.6 ملی میٹر، اقبال ٹاؤن میں 11 ملی میٹر اور لکشمی چوک میں 6.8 ملی میٹر بارش ریکارڈ کی گئی۔

محکمہ موسمیات نے پیشگوئی کی ہے کہ 24 جولائی تک لاہور سمیت پنجاب کے مختلف علاقوں میں بارشوں کا سلسلہ وقفے وقفے سے جاری رہ سکتا ہے۔

دوسری جانب نیشنل ڈیزاسٹر مینجمنٹ اتھارٹی (این ڈی ایم اے) نے بھی خبردار کیا ہے کہ 20 سے 23 جولائی کے دوران مون سون ہواؤں اور مغربی سسٹم کے باعث گلگت بلتستان، خیبرپختونخوا، آزاد کشمیر اور بالائی پنجاب کے مختلف علاقوں میں کہیں کہیں شدید بارشیں متوقع ہیں، جس کے پیش نظر متعلقہ اداروں کو الرٹ رہنے کی ہدایت کی گئی ہے۔