آسمان میں اڑتی ٹیکسیاں: فضائی سفر میں نئی اور انقلابی سہولت متعارف

آسمان میں اڑتی ٹیکسیاں، فضائی سفر میں ایک نئی اور انقلابی سہولت متعارف ،ڈونکاسٹر شفلڈ ایئرپورٹ کے دوبارہ کھلنے کے بعد فضائی سفر میں ایک نئی اور انقلابی سہولت متعارف کرانے کی تیاریاں کی جا رہی ہیں، جس کے تحت 150 میل فی گھنٹہ کی رفتار سے سفر کرنیوالے جدید برقی طیارے، جنہیں سکائی ٹیکسیزپکارا جا رہا ہے، ایئرپورٹ سے پرواز کر سکیں گی۔
ایئرپورٹ انتظامیہ کے مطابق یہ جدید الیکٹرک طیارے ہلکے وزن کے ہوں گے اور ایک وقت میں تقریباً پانچ مسافروں کو لے جانے کی صلاحیت رکھتے ہوں گے۔
حکام کا کہنا ہے کہ یہ منصوبہ ایئرپورٹ کی مجوزہ ترقیاتی حکمتِ عملی کا اہم حصہ ہے، جس کا مقصد ڈونکاسٹر کو جدید اور ماحول دوست فضائی ٹرانسپورٹ کے مرکز کے طور پر فروغ دینا ہے۔
یہ طیارے EVTOL کہلاتے ہیں، جس کا مطلب الیکٹرک ورٹیکل ٹیک آف اینڈ لینڈنگ ہے۔ ان میں پر اور پروپیلر دونوں موجود ہوتے ہیں، جس کی بدولت یہ ہیلی کاپٹر کی طرح عمودی انداز میں اڑان بھر سکتے ہیں اور ہوائی جہاز کی طرح طویل فاصلہ طے کر سکتے ہیں۔
ڈونکاسٹر شفلڈ ایئرپورٹ کے ڈائریکٹر کرسچین فوسٹر کا کہنا ہے کہ ایئرپورٹ انتظامیہ اس منصوبے کیلئے متعدد فراہم کنندگان سے بات چیت کر رہی ہے، کیونکہ ایئرپورٹ کچھ ’’منفرد اور مختلف‘‘ کرنے کا خواہاں ہے، تاکہ فضائی مسافروں کو جدید سہولیات فراہم کی جا سکیں اور خطے میں معاشی سرگرمیوں کو فروغ مل سکے۔
ماہرین کے مطابق اگر یہ منصوبہ کامیاب ہو جاتا ہے تو نا صرف فضائی سفر تیز اور ماحول دوست ہو گا، بلکہ ڈونکاسٹر کو برطانیہ میں جدید ہوابازی کے میدان میں نمایاں مقام بھی حاصل ہو سکتا ہے۔