سعودی عرب کی پہلی 5 سٹار لگژری ٹرین متحرک ماسٹر پیس قرار

سفر و سیاحت میں اہم پیشرفت ،سعودی عرب کی پہلی 5 سٹار لگژری ٹرین متحرک ماسٹر پیس متعارف ،مملکت میں پہلی لگژری ٹرین سروس متعارف کروانے کی تیاری، جو صحرائی علاقے میں 800 میل تک سفر کرے گی۔
سعودی شہر ریاض میں فیوچر انویسٹمنٹ کانفرنس کے موقع پر ڈریم آف دی ڈیزرٹ نامی ٹرین کا آئیڈیا پیش کر دیا گیا۔اس ٹرین کا باقاعدہ آغاز 2026 کے آخر میں ہوگا۔اس پراجیکٹ پر سعودی عرب ریلویز کی جانب سے اٹلی کےآرسنیل( Arsenale )گروپ کے ساتھ ملکر منصوبے پر کام کیا جارہا ہے۔
تفصیلات کے مطابق800 میل طویل روٹ کے دوران یہ ٹرین سعودی عرب کے حیران کن صحرائی مقامات سے گزرے گی اور سعودی دارالحکومت ریاض کو قریات شہر سے ملائے گی۔اس ٹرین میں 14 بوگیاں موجود ہوں گی ،جن میں 34 پرتعیش کمرے مسافروں کو دستیاب ہوں گے۔ہر بوگی میں سعودی ثقافت کے مختلف پہلوؤں کو اجاگرکیا جائے گا۔
اس ٹرین میں 2 ریسٹورنٹس موجود ہوں گے، جن میں سعودی اور بین الاقوامی پکوان مسافروں کو دستیاب ہوں گے۔اس ٹرین میں ایک وقت میں 66 مسافر سفر کرسکیں گے۔یہ نئی لگژری ٹرین سروس بنیادی طور پر سیاحوں کو سعودی عرب میں لانے کے منصوبوں کا حصہ ہے۔
سعودی ریلوے کمپنی کے مطابق ڈریم آف دی ڈیزرٹ سے سیاحوں اور مقامی رہائشیوں کو سعودی عرب کے مزید خطے دیکھنے کا موقع ملے گا۔اس کے ذریعے سیاح سعودی عرب میں واقع یونیسکو کے عالمی ثقافتی ورثے میں شامل مقامات اور شاہ سلمان بن عبدالعزیز رائل نیچرل ریزرو کو بھی دیکھ سکیں گے۔