سیاحت کا فروغ :چین میں بزرگ شہریوں کیلئے سیاحتی ٹرین متعارف

سیاحت کے فروغ کیلئے منفرد اقدام ، چین میں بزرگ شہریوں کیلئے سیاحتی ٹرین متعارف کروادی گئی۔
شمال مشرقی چین کے صوبے ہیلونگ جیانگ کے دارالحکومت ہاربن سے بزرگ شہریوں کیلئے خصوصی طور پر تیار کی گئی سیاحتی ٹرین سفر پر روانہ ہو گئی۔یہ ٹرین پانچ روزہ سفر کے دوران بزرگ سیاحوں کو گھاس کے میدانوں کی سیر کرائے گی۔یہ سیاحتی ٹرین بزرگ شہری سیاحوں کی سہولت کو مدنظر رکھتے ہوئے جدید اور دوستانہ سہولیات سے آراستہ کی گئی ہے، تاکہ انہیں آرام دہ سفر فراہم کیا جا سکے ،جبکہ ٹرین میں تفریحی ویڈیوز اور دیگر سہولیات بھی فراہم کی گئی ہیں۔
اس سیاحتی ٹرین کی روانگی کے موقع پر متعددبزرگ سیاحوں نے یادگار تصاویر بھی بنوائیں۔
چینی حکام کے مطابق اس اقدام کا مقصد بزرگ شہریوں کیلئے سیاحت کو آسان اور خوشگوار بنانا ہے، تاکہ وہ چین کے مختلف قدرتی مناظر سے لطف اندوز ہو سکیں اور اپنی زندگی کے آخری ایام خوشگوار بنا سکیں۔