لاہور کے عجائب گھر کو بین الاقوامی معیار کا میوزیم بنانے کا فیصلہ

سیاحت کےفروغ اور تحریک ِپاکستان کی تاریخ محفوظ بنانے کیلئے تاریخی اقدام، لاہور کے عجائب گھر کو یونیسکو کے تعاون سے بین الاقوامی معیار کا میوزیم بنانے کا فیصلہ کر لیا گیا۔
لاہور میں 131 سال قدیم عجائب گھر کو بین الاقوامی معیار کا میوزیم بنانے کے سلسلے میں گزشتہ دنوں سینئر صوبائی وزیر مریم اورنگزیب نے لاہور میوزیم کا دورہ کیا اور آرٹ گیلریز، سکیورٹی آفس، ٹکٹ گھر کیفے ٹیریا اور مختلف حصوں کا جائزہ لیا۔
اس موقع پر ان کا کہنا تھا کہ تاریخی ورثہ اور عمارتوں کے تحفظ کے عالمی ادارے یونیسکو نے پنجاب حکومت سے تعاون پر اتفاق کیا ہے ،اس حوالے سے ورکنگ پلان تیار کر لیا گیا ہے،جس پر جلد عملدرآمد کا آغاز ہوگا اور یونیسکو لاہور عجائب گھر کو جدید ٹیکنالوجی اور عالمی معیار کے مطابق بنائے گا،جس کیلئے 240 ملین روپے مختص کیے گئے ہیں۔
اس پلان میں معاونت کیلئے کامران لاشاری،رضا علی ،نیئر علی دادا سمیت دیگر ممتاز ماہرین کی معاونت حاصل کرنے کا بھی فیصلہ کیا گیا ہے، تمام سٹیک ہولڈرز سے مشاورت کیلئے کمیٹی تشکیل دے دی گئی ہے، سیکرٹری سیاحت بھی کمیٹی میں شامل ہیں۔
پلان کے مطابق لاہور میوزیم میں آنیوالوں سیاحوں کی سہولت کیلئے مرکز ِ مہمان داری قائم کیا جائے گا، نیز گندھارا اور خطاطی پر عالمی کانفرنسیں منعقد کروائی جائیں گی ،جبکہ تاریخی نوادرات اور فن پاروں کو محفوظ بنانے کیلئے سسٹم کو ڈیجٹلائز کیا جائے گا۔
اس موقع پر اجلاس کو بریفنگ دی گئی کہ 1894 میں قائم عجائب گھر میں لاہورکی ایک ہزار سال پرانی تاریخ محفوظ ہے، جسے دیکھنے کیلئے ہرسال ہزاروں ملکی و غیر ملکی سیاح آتے ہیں۔