مدینہ منورہ دنیا کے 100 بہترین سیاحتی مقامات کی فہرست میں شامل

مدینہ منورہ میں سیاحت کا فروغ اور عروج،مدینہ شہر کو عالمی معیار کے سیاحتی مقامات کی درجہ بندی میں 100 بہترین سیاحتی مقامات میں شامل کر لیا گیا۔
عالمی سطح پر مدینہ منورہ کا نمبر 88 واں، مشرقِ وسطیٰ میں 7واں، عرب ممالک میں چھٹا اور خلیجی ممالک میں 5 واں، جبکہ سعودی عرب میں یہ شہر پہلے نمبر پر ہے۔
یہ درجہ بندی یورو مانیٹر انٹرنیشنل کے ایک حالیہ رپورٹ میں سامنے آئی ہے، جس میں 55 مختلف معیارات کی بنیاد پر دنیا بھر کے تقریباً 210 شہروں کا تجزیہ کیا۔ ان معیارات میں اقتصادی اور تجارتی کارکردگی، سیاحتی انفراسٹرکچر، سیاحتی کارکردگی، صحت اور سلامتی، پائیداری اور سیاحتی پالیسیاں شامل کی گئیں۔
مدینہ منورہ کی اس کامیابی کا سہرا مقامی حکام کی کوششوں کو جاتا ہے، جنہوں نے زائرین کے تجربات کو بہتر بنانے کیلئے بڑے پیمانے پر اقدامات کیے۔ ان اقدامات میں سیاحتی خدمات کا فروغ، سٹریٹجک منصوبہ بندی اور انفراسٹرکچر میں بہتری شامل ہیں۔
سعودی حکام کا کہنا ہے کہ یہ کامیابی مدینہ منورہ کو بین الاقوامی سطح پر ایک اہم سیاحتی مقام کے طور پر مزید مستحکم کرے گی۔