ٹوئٹر کے شریک بانی کی واٹس ایپ کے مقابلے پر نئی میسجنگ ایپ متعارف

واٹس ایپ کو ٹکر دینے کی تیاری،ٹوئٹر کے شریک بانی نے واٹس ایپ کے مقابلے پر نئی میسجنگ ایپ متعارف کرا دی۔
بٹ چیٹ(bit Chat) نامی یہ نئی ڈی سینٹرلائزڈ میسجنگ ایپ بلیوٹوتھ میشن نیٹ ورک پر کام کرتی ہے ،یعنی انٹرنیٹ نہ ہونے پر بھی اسے استعمال کیا جاسکتا ہے ، کیونکہ اس کے ساتھ کوئی سرور منسلک نہیں۔ بٹ چیٹ پر سائن اِن ہونے کیلئے فون نمبر یا ای میل کی بھی ضرورت نہیں ہوگی۔
ٹوئٹر کے شریک بانی جیک ڈورسی نے اپنی ایکس سوشل میڈیاپوسٹ پر اعلان کیا ہے کہ اس ایپ کا بیٹا (beta) ورژن ٹیسٹ فلائٹ پر لائیو کیا گیا ہے ،جبکہ مکمل وائٹ پیپر GitHub پر دستیاب ہے۔
انہوں نے ایکس پوسٹ میں اسے بلیوٹوتھ میش نیٹ ورکس پر ایک ذاتی تجربہ قرار دیا ہے، جس میں میسجز اینڈ ٹو اینڈ انکرپٹڈ ہوں گے،یعنی صارفین مقامی بلیوٹوتھ نیٹ ورکس پر ایک دوسرے سے میسجز کا تبادلہ کرسکیں گے اور وائی فائی یا کال سروس نہ ہونے پر بھی چیٹ ممکن ہوگی۔اس ایپ کے میسجز صرف ڈیوائس پر محفوظ ہوں گے، جبکہ بائی ڈیفالٹ ڈیلیٹ ہو جائیں گے۔
اس سے قبل جیک ڈورسی نے ڈی سینٹرلائزڈ سوشل میڈیا ایپ بلیو سکائی بھی متعارف کرائی تھی، مگر بعد ازاں اس سے الگ ہوگئے تھے۔بٹ چیٹ کو مسلسل کام کرنے کیلئے ڈیزائن کیا گیا ہے اور انٹرنیٹ بلاک کیے جانے پر بھی اسے استعمال کرنا ممکن ہوگا۔
اس ایپ میں گروپ چیٹس یا رومز کے نام کا فیچر بھی موجود ہے۔مستقبل قریب میں اس ایپ میں وائی فائی ڈائریکٹ آپشن بھی شامل کیا جائے گا، تاکہ اسے زیادہ طویل فاصلے کیلئے بھی استعمال کیا جاسکے۔