9مئی کیس:علیمہ خان کےبیٹےشیرشاہ کی ضمانت منظور

9مئی جناح ہاؤس حملہ کیس میں علیمہ خان کےبیٹےشیرشاہ کی  ضمانت منظورہوگئی۔
لاہورکی انسداددہشت گردی عدالت کےجج منظر علی گل نے 9 مئی جناح ہاؤس کیس میں علیمہ خان کے بیٹے شیرشاہ کی بعد از گرفتاری درخواست ضمانت پر سماعت کی۔ ملزم شیر شاہ کے وکلا رنا مدثر، بیرسٹر تیمور عدالت میں پیش ہوئے۔
وکیل رانا مدثر نے مؤقف اختیارکیاکہ مقدمے میں ابھی تک ملزم کی حد تک چالان نہیں آیا، ٹرائل نہ جانے کب شروع ہو، لہذا لامحدود وقت تک ملزم کو قیدمیں نہیں رکھا جا سکتا، ملزم کے خلاف کوئی ثبوت نہیں، ملزم کسی ہنگامہ آرائی میں ملوث نہیں۔
وکیل رانا مدثر نے استدعاکی کہ ایسے ملزمان جن پر شیر شاہ سے زیادہ سنگین الزامات تھے انہیں ضمانت دے دی گئی، شیرشاہ پر ایسا کوئی الزام نہیں کہ اس نے توڑ پھوڑ کی ہو، صرف ایک ملزم کی نشاندہی پر کسی دوسرے کو ملوث نہیں کیا جاسکتا۔
عدالت نےدلائل سننےکےبعدعلیمہ خان کےبیٹےشیرشاہ کی ضمانت پر فیصلہ محفوظ کر لیا، بعد ازاں عدالت نے فیصلہ جاری کرتے ہوئے شیر شاہ کی ضمانت منظور کرلی۔
عدالت نےایک لاکھ کےضمانتی مچلکوں کےعوض ملزم شیرشاہ کی رہائی کاحکم دیا۔
اس موقع پربانی پی ٹی آئی عمران خان کی بہنیں علیمہ خان اور عظمیٰ خان انسدادِ دہشت گردی میں پہنچیں، جبکہ سابق وفاقی وزیر شاہ محمود قریشی کی اہلیہ مہرین قریشی بھی عدالت میں پہنچیں۔