چیٹ جی پی ٹی صارفین کو جیمنائی پر لانے کیلئے گوگل کا نیا فیچر متعارف

گوگل صارفین کیلئے اہم خبر،گوگل کی جانب سے جیمنائی کیلئے امپورٹ آرٹی فیشل انٹیلی جنس (اے آئی) چیٹس نامی فیچر کی آزمائش کی جا رہی ہے۔
بنیادی طور پر یہ فیچر چیٹ جی پی ٹی صارفین کو مستقل طور پر جیمنائی میں منتقل کرنے کی کوشش ہے۔اس فیچر سے صارفین اپنی چیٹ جی پی ٹی یا کسی بھی اے آئی چیٹ بوٹ کی مکمل چیٹ ہسٹری کو جیمنائی میں منتقل کرسکیں گے۔اس طرح وہ جیمنائی میں اپنے پراجیکٹس، ترجیحات اور دیگر سے محروم نہیں ہوں گے۔
صارفین کیلئے چیٹ جی پی ٹی یا دیگر سے جیمنائی اے آئی پلیٹ فارم پر منتقل ہونا آسان ہو جائے گا۔اے آئی چیٹ بوٹس عموماً کسی صارف کی پرانی چیٹس کو مدنظر رکھ کر اپنے جوابات فراہم کرتے ہیں۔کسی چیٹ بوٹ کا طویل عرصے تک استعمال پرسنلائزیشن کا عمل ممکن بناتا ہے اور ایسا کسی نئے چیٹ بوٹ میں منتقل ہونے پر مشکل ہوتا ہے۔
رپورٹ کے مطابق گوگل کی جانب سے ابھی اس فیچر کی آزمائش کی جا رہی ہے اور اس کا مقصد چیٹ جی پی ٹی صارفین کو آسانی سے جیمنائی میں منتقل ہونے میں مدد فراہم کرنا ہے۔یہ فیچر ابھی جیمنائی کے ویب ورژن کے بیٹا (beta) آپشن میں دیکھنے میں آیا ہے، جس سے عندیہ ملتا ہے کہ بہت جلد اسے تمام افراد کیلئے متعارف کروایا جاسکتا ہے۔
رپورٹ کے مطابق یہ فیچر ابھی چیٹ جی پی ٹی، گروک اور کلاؤڈی پر کام کر رہا ہے۔صارفین کو اور یجنل سروس سے اپنی چیٹ ڈیٹا کو ڈاؤن لوڈ کرنا ہوتا ہے اور پھر اس فائل کو جیمنائی میں اپ لوڈ کرنا ہوتا ہے۔