انسٹاگرام پروفائلز پر پوسٹس کی نئی ترتیب کا فیچر متعارف

انسٹا گرام نے صارفین کے لیے ایک نیا فیچر متعارف کرایا ہے جس کی طویل عرصے سے مانگ کی جا رہی تھی۔

انسٹا گرام کے سربراہ ایڈم موسیری نے تقریباً ایک سال قبل اس فیچر کا اعلان کیا تھا، جو اب باضابطہ طور پر صارفین کے لیے جاری کر دیا گیا ہے۔

اس نئے فیچر کے ذریعے صارفین اپنی پروفائل کو اپنی پسند کے مطابق ترتیب دے سکیں گے اور مواد کو منظم کرنے میں زیادہ آزادی حاصل ہوگی۔

یہ سہولت دنیا بھر کے صارفین کے لیے دستیاب ہے اور اس کے ذریعے پروفائل پر کنٹرول پہلے سے زیادہ بہتر ہو گیا ہے۔

پروفائل سیٹنگز میں ایک نیا “ری آرڈر” آپشن شامل کیا گیا ہے، جس کی مدد سے صارفین اپنی پوسٹس کو اپنی مرضی کے مطابق کسی بھی جگہ منتقل کر سکتے ہیں، چاہے وہ کئی سال پرانی ہی کیوں نہ ہوں۔

اس تبدیلی کے بعد صارفین اپنی پروفائل گرڈ میں اہم پوسٹس کو اوپر نمایاں طور پر رکھ سکیں گے، جو پہلے ممکن نہیں تھا کیونکہ پوسٹس صرف زمانی ترتیب کے مطابق ظاہر ہوتی تھیں۔

اس سے قبل انسٹا گرام پروفائلز میں تازہ ترین پوسٹ سب سے اوپر دکھائی دیتی تھی، جبکہ اب صارفین کو یہ آزادی حاصل ہو گئی ہے کہ وہ پرانی پوسٹس کو بھی اپنی مرضی سے ترتیب دے سکیں۔

کمپنی کے مطابق یہ فیچر صارفین کی بڑی طلب پر متعارف کرایا گیا ہے تاکہ وہ اپنی پروفائل کو بہتر انداز میں ڈیزائن اور نمایاں مواد کو آسانی سے ہائی لائٹ کر سکیں۔