دوران حج 1301 حجاج جاں بحق ہوئے، سعودی عرب نے تصدیق کردی

حج کی ادائیگی کے دوران سعودی عرب میں حجاج کرام کی اموات کے حوالے سے سعودی وزارت صحت کا بیان سامنے آگیا۔ سعودی وزیر صحت فہد بن عبدالرحمٰن نے دوران حج 1301 حجاج کی اموات کی تصدیق کردی ہے۔

انہوں نے کہا ہے کہ یہ اموات مناسب پناہ گاہ نہ ہونے اور آرام کئے بغیر براہ راست تیز دھوپ میں طویل فاصلے تک پیدل چلنے کی وجہ سے ہوئیں۔ سعودی وزیر صحت کا کہنا ہے کہ جاں بحق حجاج میں متعدد معمر افراد اور دائمی بیماریوں میں مبتلا افراد بھی شامل ہیں جبکہ 83 فیصد اموات ان حجاج کی ہوئیں جو اجازت کے بغیر حج میں شامل ہوئے تھے۔

دوسری جانب پاکستان کی وزارت مذہبی امور نے حج کے دوران ہیٹ ویو سے 35 پاکستانیوں کے جاں بحق ہونے کی تصدیق کی تھی۔ پاکستان کے حج مشن کے ڈائریکٹر جنرل عبدالوہاب سومرو کے مطابق منیٰ میں 4، عرفات 3 اور مزدلفہ میں 2 پاکستانی جاں بحق ہوئے جبکہ 20 پاکستانی حجاج کی اموات مکہ اور 6 کی مدینہ منورہ میں ہوئیں۔

واضح رہے کہ اس سال 18 لاکھ افراد نے حج کا فریضہ انجام دیا۔ دوران حج درجہ حرارت 51.8 ڈگری سینٹی گریڈ تک پہنچ گیا تھا۔ سعودی محکمہ موسمیات نے پیشگوئی کررکھی تھی کہ رواں برس حج سیزن کے دوران شدید گرمی پڑے گی اور اس صورتحال کے پیش نظر حجاج کرام کیلئے جگہ جگہ ٹھنڈے پانی کا انتظام اور مختلف مقامات پر فوارے بھی لگائے گئے تھے۔