گوگل کے مقابلے پر چیٹ جی پی ٹی کے سرچ انجن کی آسان رسائی

گوگل کے مقابلے پر چیٹ جی پی ٹی کا سرچ انجن سامنے آگیا۔گوگل سرچ انجن کی بالادستی کیلئے چیٹ جی پی ٹی سرچ انجن تک رسائی آسان بنادی گئی۔
اوپن اے آئی کا آرٹی فیشل انٹیلی جنس ٹیکنالوجی سے لیس سرچ انجن اب تمام صارفین کو دستیاب ہو گا۔یہاں تک کہ وہ صارفین بھی اب اسے استعمال کرسکتے ہیں ،جن کا چیٹ جی پی ٹی اکاؤنٹ نہیں بنا ہوا۔ذہن نشین رہے کہ اکتوبر 2024 میں چیٹ جی پی ٹی کا سرچ انجن متعارف کرایا گیا تھا، تاکہ گوگل کو اس شعبے میں سخت ٹکر دی جاسکے،مگر اس وقت کمپنی کا کہنا تھا کہ یہ سرچ انجن چیٹ جی پی ٹی کے ماہانہ فیس ادا کرنیوالے صارفین کو دستیاب ہوگا اور وہ رئیل ٹائم تفصیلات حاصل کرسکیں گے۔
کمپنی کی جانب سے اب سوشل میڈیا پوسٹ میں اعلان کیا گیا ہےکہ چیٹ جی پی ٹی کا سرچ انجن تمام صارفین کیلئے متعارف کرایا جا رہا ہے اور اسے استعمال کرنے کیلئے سائن اپ یا لاگ ان ہونے کی ضرورت نہیں ہو گی۔اس سرچ انجن کو چیٹ جی پی ٹی کے ویب ورژن کا حصہ بنایا گیا ہے۔اسے استعمال کرنے کیلئے صارفین کو ویب سائٹ پر سرچ بٹن پر کلک کرنا ہوگا، جس کے بعد اے آئی چیٹ بوٹ کی جانب سے روایتی گفتگو کے انداز میں صارفین کے سوالات کا جواب دیا جائے گا۔
اس کے ساتھ چیٹ جی پی ٹی کی جانب سے انٹرنیٹ پر موجود متعلقہ تفصیلات جیسے تصاویر اور ویب لنکس بھی فراہم کیے جائیں گے۔ان لنکس کو سرچ انجن کے انداز میں پیش کیا جائے گا۔
ایک حالیہ رپورٹ کے مطابق اگرچہ اب بھی سرچ انجن کے شعبے میں گوگل کو واضح بالادستی حاصل ہے، مگر چیٹ جی پی ٹی پر سرچ ٹریفک میں مسلسل اضافہ ہو رہا ہے۔اب جب چیٹ جی پی ٹی سرچ کو تمام صارفین استعمال کرسکیں گے تو ممکنہ طور پر ٹریفک میں بھی مزید اضافہ ہوگا اور گوگل کو حقیقی سخت چیلنج کا سامنا ہوگا۔