جی ایچ کیو حملہ کیس:عمرایوب ،شبلی فرازسمیت 14ملزمان کےوارنٹ گرفتاری جاری

جی ایچ کیوحملہ کیس میں عمرایوب اورشبلی فرازسمیت 14ملزمان کےناقابل ضمانت وارنٹ گرفتاری جاری کردئیےگئے۔
راولپنڈی کی انسداد دہشت گردی عدالت میں 9 مئی کے واقعات سے متعلق مقدمات کی سماعت ہوئی ، جس میں جی ایچ کیو حملہ کیس بھی شامل ہے۔سماعت کے دوران عدالت نے جی ایچ کیو حملہ کیس میں نامزد 14 ملزمان کی حاضری سے استثنیٰ کی درخواستیں مسترد کر دیں۔
ان ملزمان میں پی ٹی آئی رہنما عمر ایوب، شبلی فراز، کنول شوذب، زرتاج گل، احمد چٹھہ، راشد شفیق، رائے مرتضیٰ، بلال اعجاز اور چودھری آصف سمیت دیگر شامل ہیں۔
عدالت نے ملزمان کی مسلسل عدم حاضری کو مدنظر رکھتے ہوئے ان کے خلاف ناقابلِ ضمانت وارنٹ گرفتاری جاری کر دیے۔مزید سماعت آئندہ تاریخ پر ہو گی، جہاں ان وارنٹس کی تعمیل سے متعلق رپورٹ پیش کیے جانے کا امکان ہے۔