غذر: گلیشیئر پھٹنے سے سیلاب کی تباہ کاریاں، متعدد دیہات زیر آب

گلگت بلتستان کے ضلع غذر میں گلیشیئر پھٹنے سےسیلاب نےتباہی مچادی ۔جبکہ متعددگاؤں زیرآب آگئے۔
ضلعی انتظامیہ کےمطابق گلگت شندور روڈ لینڈسلائیڈنگ کےباعث مکمل طورپر بندہوگئی ہے،جس کی وجہ سےلوگ محصورہوکر رہےگئےہیں، تلی داس نالہ میں لینڈ سلائیڈنگ دو اطراف سے ہوئی،جس کے باعث راؤشن گاؤں کی آبادی محصور ہوگئی۔
وزیرداخلہ گلگت بلتستان شمس لون نےبتایاکہ غذرمیں سیلاب نےایک بار پھر سے تباہی مچادی ،تاہم ابھی تک کوئی جانی نقصان نہیں ہوا ہے۔سیلاب کی وجہ سےکچھ افرادکے پھنسنے کی اطلاع ہےجن کوریسکیو کےلئےہیلی کاپٹرطلب کرلیاگیاہے۔
ترجمان جی بی حکومت فیض اللہ فراق کےمطابق غذر کےعلاقے تلی داس کے مقام پر گلیشیئر پھٹنے سے سیلابی صورتحال اور تباہی ہوئی۔جس کےباعث متعددگاؤں زیر آب آگئے،شدید مالی نقصان ہوا تاہم جانی نقصان نہیں ہوا، دریا کا بہاؤ رکنے کے باعث مزید نقصانات کا خدشہ ہے۔
انہوں نے بتایا کہ گلیشیئر پھٹنے سے پانی ایک جھیل کی صورت اختیار کرگیا ہے، متصل دیہات زیرآب آنے کاخدشہ ہے، 50 سے زائد افراد کو ریسکیو کر لیا گیا ہے۔
ایڈیشنل ڈپٹی کمشنر غذر کا بتانا ہے کہ گزشتہ رات 3بجےسےتلی داس راؤشن میں لینڈ سلائیڈ نگ کے باعث دریائے غذر مکمل طورپربند ہے، جس سےمزید آبادیاں سیلابی پانی کے کٹاؤ کی زد میں آرہی ہیں۔ لوگوں کو بروقت اطلاع دی گئی جس سے کوئی جانی نقصان نہیں ہوا۔