کراچی سے لاہور پہلی بلٹ ٹرین چلانے کا منصوبہ سامنے آگیا

ریل کے مسافروں کیلئے خوشخبری،کراچی سے لاہور پہلی بلٹ ٹرین چلانے کا منصوبہ سامنے آگیا۔ رفتار کیا ہوگی؟تفصیلات سامنے آ گئیں۔
پاکستان ریلویز نے لاہور سے کراچی کے درمیان بلٹ ٹرین منصوبے کا اعلان کر دیا ، جس کے تحت دونوں شہروں کے درمیان سفر کا دورانیہ 20 گھنٹوں سے کم ہو کر صرف 5 گھنٹے رہ جائے گا۔
میڈیاذرائع کے مطابق لاہور سے کراچی تیز رفتار بلٹ ٹرین 2030 تک چلانے کا منصوبہ ہے۔بلٹ ٹرین منصوبہ 1215 کلومیٹر طویل ہائی سپیڈ ریل لائن چین پاکستان اقتصادی راہداری،سی پیک کے تحت 6.8 ارب ڈالر مالیت کے ایم ایل1 اَپ گریڈ منصوبے کا حصہ ہے۔
وزیر ریلوے حنیف عباسی کے مطابق اس منصوبے میں چین کی معاونت شامل ہوگی اور اسے چائنا ریلوے کنسٹرکشن کارپوریشن کی مدد سے مکمل کیا جائے گا۔بلٹ ٹرین کی رفتار 250 کلومیٹر فی گھنٹہ تک ہوگی ، جبکہ اس کا راستہ حیدرآباد، ملتان اور ساہیوال جیسے اہم شہروں سے گزرے گا۔ منصوبے میں دہری نئی پٹڑیوں کی تنصیب، پرانے پلوں کی ازسر نو تعمیر اور جدید سگنلنگ سسٹم کی تنصیب شامل ہے۔
ریلوےحکام کے مطابق یہ منصوبہ نا صرف شہریوں کیلئے تیز، آرام دہ اور محفوظ سفر فراہم کرے گا، بلکہ اس سے ہزاروں ملازمتوں کے مواقع بھی پیدا ہوں گے۔