جی ایچ کیو حملہ کیس: جیل ٹرائل کا نوٹیفکیشن منسوخ، عمران خان ویڈیو لنک پر پیش ہونگے

جی ایچ کیو حملہ کیس میں جیل ٹرائل کا نوٹیفکیشن منسوخ، عمران خان ویڈیو لنک کےذریعےپیش ہوں گے۔
انسداد دہشت گردی عدالت کے جج امجد علی شاہ نے 9 مئی کے کیسز کی سماعت کے دوران ہدایت دی کہ عمران خان کی ویڈیو لنک کے ذریعے پیشی کے انتظامات یقینی بنائے جائیں۔
جس پرپنجاب حکومت نے جی ایچ کیو حملہ کیس میں جاری جیل ٹرائل کا نوٹیفکیشن منسوخ کر دیا ہے۔ اب کیس کی آئندہ سماعت یکم اکتوبر کو انسداد دہشت گردی عدالت میں ہوگی، جس میں سابق بانی چیئرمین پی ٹی آئی عمران خان ویڈیو لنک کے ذریعے شریک ہوں گے۔
عدالت نے جی ایچ کیو حملہ کیس میں تین گواہان کو یکم اکتوبر کے لیے طلبی کے نوٹس جاری کیے ہیں اور ان کی حاضری یقینی بنانے کی ہدایت بھی کی ہے۔عدالت نے سانحہ 9 مئی سے متعلق تمام 12 مقدمات کی سماعت یکم اکتوبر تک ملتوی کر دی، جبکہ 11 مقدمات میں چالان کی نقول بھی اسی تاریخ کو تقسیم کی جائیں گی۔شاہ محمود قریشی کو بھی لاہور جیل سے ویڈیو لنک پر پیش کیا جائے گا۔
عدالت کو بتایا گیا کہ جی ایچ کیو حملہ کیس کا جیل ٹرائل گزشتہ تین ماہ سے التوا کا شکار تھا۔عدالت نے تمام نامزد ملزمان کو یکم اکتوبر کو عدالت میں حاضری یقینی بنانے کا حکم دیا ہے، اور ان کے لیے سمن بھی جاری کر دیے گئے ہیں۔اس موقع پر وزیر اعلیٰ خیبرپختونخوا علی امین گنڈاپور کو بھی طلبی کا سمن جاری کیا گیا، جبکہ عمر ایوب، شبلی فراز، زرتاج گل اور کنول شوزب وارنٹ گرفتاری کے باوجود عدالت میں پیش نہ ہوئے۔
عدالت نے ان چاروں رہنماؤں کو اشتہاری قرار دینے کی قانونی کارروائی کا آغاز کر دیا ہے۔ فیصل آباد کی عدالتوں سے جاری 14 ملزمان کے وارنٹ گرفتاری کا حوالہ بھی عدالت میں پیش کیا گیا۔