ٹیکنالوجی کی دنیاکانیاشاہکار:دنیا کا سب سے بڑا الیکٹرک بحری جہاز لانچ

ٹیکنالوجی کی دنیاکانیاشاہکار،چین نے دنیا کا سب سے بڑا الیکٹرک بحری کارگو جہاز لانچ کردیا ، جو روایتی ایندھن کی بجائے لیتھیئم بیٹریوں پر چلتا ہے۔
تفصیلات کے مطابق گیزوبا نامی اس جہاز کی لمبائی 130 میٹر ہے اور یہ 13 ہزار ٹن تک وزن اٹھانے کی صلاحیت رکھتا ہے۔ یہ جہاز 12 لیتھیئم بیٹری پاور یونٹس سے چلتا ہے ،جو مجموعی طور پر 24 ہزار کلو واٹ آور بجلی فراہم کرتے ہیں۔
انجینئرز کے مطابق اس جہاز میں بیٹریوں کو تیزی سے تبدیل کرنے کی سہولت بھی موجود ہے، جبکہ اس کی زیادہ سے زیادہ رینج 500 کلومیٹر تک ہے۔اس کے علاوہ اس میں نصب جدید سمارٹ کنٹرول سسٹم کی بدولت جہاز ریموٹ نیویگیشن اور آٹومیٹک برتھنگ جیسی جدید خصوصیات سے لیس ہے۔
چائنیز اکیڈمی آف انجینئرنگ کے ترجمان کا کہنا ہے کہ اس جہاز کی تیاری صرف ایک نئی پروڈکٹ کی تخلیق نہیں ،بلکہ ایک جامع تکنیکی کامیابی ہے، جس کے دوران بڑی بیٹریوں، ڈی سی پاور سسٹمز اور ریموٹ پائلٹنگ ٹیکنالوجی کو کامیابی سے آزمایا گیا، اس منصوبے میں نئے انجن، سمارٹ کنٹرول سسٹم اور ساحلی انفراسٹرکچر کو ایک مربوط نظام کے طور پر استعمال کیا گیا، جس سے ملٹی نیٹ ورک انٹیگریشن اور شپ ٹو شور کمیونیکیشن جیسی جدید صلاحیتوں کو عملی شکل دی گئی، یہ الیکٹرک جہاز سالانہ 617 ٹن ایندھن کی بچت کرے گا اور کاربن کے اخراج میں 2 ہزار ٹن تک کمی لائے گا، جو گرین شپنگ انڈسٹری کی جانب ایک اہم قدم ہے۔