ایشیا کی بہترین جامعات: پاکستان کی کون سی یونیورسٹیاں شامل ہیں؟فہرست جاری

ایشیا کی بہترین جامعات میں پاکستان کی کون سی یونیورسٹیاں شامل ہیں؟ فہرست جاری کردی گئی۔
پاکستان کے اعلیٰ تعلیم کے شعبے میں بڑی پیشرفت سامنے آگئی، کیونکہ آٹھ پاکستانی جامعات کو کوکویریلی سائمنڈز (QS) ایشیا یونیورسٹی رینکنگ 2026 میں شامل کر لیا گیا ہے۔اسلام آباد میں قائم پاکستان انسٹیٹیوٹ آف انجینئرنگ اینڈ اپلائیڈ سائنسز نے سب سے نمایاں پوزیشن حاصل کی ہے اور 238ویں نمبر پر رہا، اسی شہر کی ایئر یونیورسٹی 328ویں نمبر پر رہی، جبکہ بحریہ یونیورسٹی کراچی نے 416واں مقام حاصل کیا۔
اسلامیہ یونیورسٹی بہاولپور نے 434ویں پوزیشن حاصل کر کے جنوبی پنجاب کی نمایاں جامعہ کا اعزاز اپنے نام کیا۔ اسی طرح یونیورسٹی آف ویٹرنری اینڈ اینیمل سائنسز پتوکی 607ویں، ہزارہ یونیورسٹی مانسہرہ 614ویں، یونیورسٹی آف سوات 761 سے 770 کے درمیان اور یونیورسٹی آف ساہیوال 951 سے 1000 کے درمیان رینکنگ میں شامل ہیں۔
یہ رینکنگ اس بات کی واضح علامت ہے کہ پاکستان کی جامعات تحقیق، تدریسی معیار اور بین الاقوامی روابط کے میدان میں مسلسل ترقی کر رہی ہیں۔
QS ادارے کے مطابق یہ درجہ بندی 2009 سے جاری کی جا رہی ہے، جس میں جامعات کو مختلف معیاروں پر جانچا جاتا ہے، جن میں تعلیمی ساکھ، روزگار فراہم کرنیوالے اداروں کی رائے، فیکلٹی اور طلبا کا تناسب، بین الاقوامی تحقیقاتی نیٹ ورک، تحقیقی مقالوں کی تعداد، حوالہ جات، پی ایچ ڈی فیکلٹی کا تناسب، بین الاقوامی اساتذہ و طلبا کی موجودگی اور طلبا کے تبادلے کے پروگرام شامل ہیں۔رواں سال کی فہرست میں ایشیا کی 1500 سے زائد جامعات شامل کی گئی ہیں۔
ہانگ کانگ یونیورسٹی نے پہلی، چین کی پیکنگ یونیورسٹی نے دوسری اور سنگاپور کی دو جامعات نانیانگ ٹیکنالوجیکل یونیورسٹی اور نیشنل یونیورسٹی آف سنگاپور نے مشترکہ طور پر تیسری پوزیشن حاصل کی ہے۔