تعلیمی اداروں میں موسم سرما کی تعطیلات کا شیڈول جاری

طلبا و طالبات کیلئے خوشخبری، تعلیمی اداروں میں موسم سرما کی تعطیلات کا شیڈول جاری کردیاگیا۔
صوبہ پنجاب ، بلوچستان اور خیبر پختونخوا کے تعلیمی اداروں میں موسم سرما کی تعطیلات کا شیڈول سامنے آگیا ۔صوبہ پنجاب میں موسم سرما کی تعطیلات کا آغاز 23 دسمبر 2025سے ہو گا اور چھٹیاں 11جنوری 2026تک جاری رہیں گی۔پنجاب میں سرکاری و نجی سکول 12جنوری کو دوبارہ کھلیں گے، اس کے ساتھ ہی نئے تعلیمی سیشن کا آغاز ہو گا۔
دوسری جانب بلوچستان کی وزارت تعلیم کے مطابق سرد علاقوں میں 16دسمبر سے اڑھائی ماہ کیلئے سرکاری و نجی سکول بند رہیں گے، یہ شیڈول تمام سرکاری اور نجی سکولوں پر یکساں طور پر لاگو ہو گا،جبکہ خیبرپختونخوا کے میدانی علاقوں میں موسم سرما کی تعطیلات 22دسمبر سے 31دسمبر تک ،جبکہ پہاڑی علاقوں میں 22دسمبر سے 29فروری تک ہوں گی۔
حکومت نے سکولوں کے اوقات کار میں تبدیلی کی تھی، تاکہ طلبہ کو بڑھتی ہوئی سموگ سے محفوظ رکھا جا سکے۔دوسری طرف وفاقی حکومت نے بھی رواں سال کے دوران چھٹیوں کا نوٹیفکیشن جاری کردیا ہے۔
نوٹیفکیشن کے مطابق 25دسمبر 2025بروز جمعرات کو یوم قائداعظم کی عام تعطیل ہوگی ،جبکہ 26دسمبر 2025بروز جمعہ کو مسیحی ملازمین کیلئے کرسمس کے بعد کی عام تعطیل ہوگی۔