فضائی رابطہ :ڈھاکہ سے کراچی کیلئےپروازوں کا شیڈول جاری

پاکستان اور بنگلہ دیش کے درمیان براہِ راست فضائی رابطے کی بحالی میں اہم پیشرفت،ڈھاکہ سے ڈائریکٹ کراچی کیلئےپروازوں کا شیڈول جاری،13 سال بعد ڈھاکہ سے پہلی براہِ راست پرواز 29 جنوری کو کراچی پہنچے گی۔بنگلہ دیش کی بیمان ایئر لائن نے کراچی کیلئے براہ ِ راست پروازوں کا شیڈول جاری کردیا ۔
ذرائع کے مطابق تقریباً13 سال بعد بنگلہ دیش کی بیمان ائیرلائن کی پہلی پرواز 29 جنوری کو ڈھاکہ سے کراچی پہنچے گی، ابتدائی طور پر بیمان ائیر ڈھاکہ اور کراچی کے درمیان ہفتہ وار 2 پروازیں چلائے گی۔ اس سے قبل بنگلہ دیش سے آخری براہ راست پرواز 2012 میں کراچی آئی تھی۔
بیمان ائیرلائن نے ڈھاکہ سے کراچی کی پروازوں پر نشستوں کی بکنگ شروع کردی ہے اور ٹریول ایجنٹس کے مطابق بکنگ کھلتے ہی ابتدائی پروازوں کی تمام نشستیں چند گھنٹوں میں بک ہو گی ہیں۔
ٹریول ایجنٹس کا کہنا ہے کہ پاکستان اور بنگلہ دیش کے درمیان فضائی رابطے کی بحالی پر دونوں ممالک کے عوام پرُجوش ہیں۔
ذہن نشین رہے کہ سول ایوی ایشن اتھارٹی نے حکومتی ہدایات پر چند روز قبل ہی بیمان ائیرلائن کو کراچی کیلئے براہ راست پروازوں کی اجازت دی ہے، جبکہ قومی ایئر لائن پی آئی اے اور بیمان ائیر کے درمیان کارگو کی نقل و حمل کیلئے بھی گزشتہ ماہ معاہدہ طے پاچکا ہے۔