چین کے شہر شینژین میں طلبا کی ایک ٹیم نے دنیا کا سب سے بڑا ریموٹ کنٹرول کاغذی طیارہ تیار کر کے کامیاب پرواز کروا دی اور نیا عالمی ریکارڈ قائم کر دیا۔
ژیلی مڈل اسکول کے طلبا پر مشتمل اس ٹیم کی قیادت جماعت اول کے طالب علم ژو جونجیے کر رہے تھے، جنہوں نے تقریباً چھ ماہ کی محنت کے بعد یہ منفرد آر سی کاغذی طیارہ تیار کیا۔
اس طیارے کے پروں کا پھیلاؤ 6.06 میٹر اور جسم کی لمبائی 5.06 میٹر تھی۔ یہ جہاز اپنی پہلی آزمائشی پرواز میں تقریباً 15 منٹ تک فضا میں رہا اور بعد ازاں کامیابی سے لینڈ کر گیا۔
ٹیم لیڈر ژو جونجیے کے مطابق اس منصوبے کا مقصد کاغذی طیارے کے بنیادی اصولوں کو جدید انجینئرنگ ٹیکنالوجی کے ساتھ ملا کر ایک بڑے اور مستحکم ماڈل کی تیاری تھا۔
ذرائع کے مطابق ٹیم نے اس سے قبل بھی قومی سطح پر کامیابیاں حاصل کی تھیں، جس کے بعد انہیں عالمی ریکارڈ قائم کرنے کی ترغیب ملی۔ تحقیق کے دوران معلوم ہوا کہ اس سائز کا بغیر پائلٹ ریموٹ کنٹرول کاغذی طیارہ پہلے کبھی نہیں بنایا گیا تھا۔
