واٹس ایپ پر بلاک ہونے کا پتا لگانا اب آسان؟ نیا طریقہ سامنے آ گیا

واٹس ایپ کے ایک اندرونی سیکیورٹی فیچر کے ذریعے اب ممکنہ طور پر یہ معلوم کیا جا سکتا ہے کہ کسی صارف نے آپ کو بلاک کیا ہے یا نہیں، وہ بھی بغیر میسج یا کال کیے۔

رپورٹس کے مطابق واٹس ایپ کا خودکار اینڈ ٹو اینڈ انکرپشن ویری فکیشن سسٹم بلاک ہونے کے امکان کی نشاندہی کرنے میں مدد دے سکتا ہے۔ یہ فیچر دراصل چیٹس کی سیکیورٹی اور انکرپشن کی تصدیق کے لیے متعارف کرایا گیا تھا تاکہ صارفین کی گفتگو مکمل طور پر محفوظ رہے۔

اس فیچر کو استعمال کرنے کے لیے صارف متعلقہ چیٹ کھول کر کانٹیکٹ کے نام پر ٹیپ کرے اور پھر “Encryption” کا آپشن منتخب کرے۔ اس کے بعد واٹس ایپ خودکار طور پر چیٹ کی انکرپشن کی جانچ کرتا ہے۔

اگر ویری فکیشن کامیابی سے مکمل ہو جائے تو اس کا مطلب ہے کہ سب کچھ معمول کے مطابق کام کر رہا ہے۔ تاہم اگر واٹس ایپ بار بار انکرپشن کی تصدیق میں ناکام ہو اور متبادل طریقوں کی تجویز دے، تو یہ کسی غیر معمولی صورتحال کا اشارہ ہو سکتا ہے، جس میں بلاک کیا جانا بھی شامل ہو سکتا ہے۔

اس طریقے کا ایک اہم پہلو یہ ہے کہ اس کے لیے نہ کوئی پیغام بھیجنے کی ضرورت ہوتی ہے اور نہ ہی کال کرنے کی، جبکہ دوسرے صارف کو بھی اس حوالے سے کوئی اطلاع موصول نہیں ہوتی۔

تاہم واٹس ایپ نے ابھی تک باضابطہ طور پر اس بات کی تصدیق نہیں کی کہ یہ فیچر بلاک ہونے کی جانچ کے لیے استعمال کیا جا سکتا ہے۔ ماہرین کے مطابق اسے حتمی ثبوت کے بجائے صرف ایک ممکنہ اشارہ سمجھا جانا چاہیے، کیونکہ انکرپشن ویری فکیشن میں ناکامی کی دیگر تکنیکی وجوہات بھی ہو سکتی ہیں۔