کم درجہ حرارت اور کم ہوا : لاہور کے اے کیو آئی میں اضافہ ریکارڈ

کم درجہ حرارت اور کم ہوا کے باعث لاہور کے اے کیو آئی میں اضافہ ریکارڈکیاگیا۔
ماحولیاتی ماہرین کے مطابق کم ونڈ سپیڈ اور سرد موسم میں فضائی آلودگی کے ذرات فضا میں معلق رہنے سے اے کیو آئی میں اضافہ ممکن ہوا۔دوسری طرف حکومت پنجاب کی زیرو ٹالرنس پالیسی کے تحت سموگ کے خلاف کارروائیاں جاری ہیں، جبکہ ای پی اے اور ضلعی انتظامیہ فیلڈ میں متحرک ہیں۔اینٹوں کے بھٹوں، صنعتی اخراج، اوپن فوڈ پوائنٹس اور دھواں چھوڑنے والی گاڑیوں کیخلاف کریک ڈاؤن میں تیزی آگئی ہے۔
مصنوعی دھواں پیدا کرنیوالی سرگرمیوں پر فوری جرمانے اور سیلنگ کا عمل جاری ہے، جبکہ سموگ ہاٹ سپاٹس کی مسلسل مانیٹرنگ کی جارہی ہے۔
ماہرین کا کہنا ہے کہ موسمی حالات عارضی ہیں، جبکہ ہوا کی رفتار میں اضافے سے اے کیو آئی میں بہتری متوقع ہے اور عوامی تعاون کے بغیرآلودگی اور سموگ پر قابو ممکن نہیں۔
محکمہ صحت نے ہدایت دی ہے کہ شہری غیر ضروری طور پر باہر نکلنے سے گریز کریں اور ماسک کا استعمال کریں، اسی طرح بچوں، بزرگوں اور سانس کے مریضوں کو خصوصی احتیاط برتنے، کھلی فضا میں ورزش محدود رکھنے کا مشورہ دیا گیا ہے۔