پاکستان کی فضائی حدود بھارتی پروازوں کے لیے بندش میں 24 جولائی تک توسیع

پاکستان ایئرپورٹس اتھارٹی نے بھارتی پروازوں کے لیے پاکستانی فضائی حدود کی بندش میں مزید توسیع کرتے ہوئے اسے 24 جولائی 2026ء تک بڑھا دیا ہے۔

نئے نوٹم کے مطابق بھارتی رجسٹرڈ، کمرشل اور فوجی طیاروں کو پاکستان کی فضائی حدود میں داخلے کی اجازت نہیں ہوگی۔ اس پابندی کا اطلاق بھارتی ایئرلائنز کے لیز پر حاصل کیے گئے طیاروں اور بھارتی افراد یا اداروں کی ملکیت یا آپریٹ ہونے والے جہازوں پر بھی ہوگا۔

نوٹم میں واضح کیا گیا ہے کہ بھارتی طیارے مزید ایک ماہ تک پاکستانی فضائی حدود استعمال نہیں کر سکیں گے، اور یہ پابندی 24 جولائی 2026ء کی صبح 5 بجے تک برقرار رہے گی۔

واضح رہے کہ پاکستان نے بھارتی طیاروں کے لیے فضائی حدود 23 اپریل 2025ء سے بند کر رکھی ہے۔ اس پابندی کے باعث بھارتی ایئرلائنز کو بھاری مالی نقصان کا سامنا بھی کرنا پڑا ہے۔