یوٹیوب میں ہیک اکاؤنٹ ریکور کرنیوالا اے آئی چیٹ متعارف

یوٹیوب صارفین کیلئے بڑی خوشخبری،دنیا کے سب سے بڑے ویڈیو پلیٹ فارم نے ہیک اکاؤنٹ ریکور کرنے میں مددگار اے آئی چیٹ متعارف کروا دیا۔
یوٹیوب کا اکاؤنٹ ہیک ہو جائے تو اس کی واپسی لگ بھگ ناممکن ہوتی ہے یاپھر اس کیلئے کافی انتظار کرنا پڑتا ہے،مگر یہ اے آئی چیٹ بوٹ اکاؤنٹ ریکور کرنے کیساتھ اس کی سیکیورٹی کو بھی مضبوط بنائے گا۔
یوٹیوب نے آرٹی فیشل انٹیلی جنس ٹیکنالوجی پر مبنی ایسا ڈیجیٹل اسسٹنٹ متعارف کرایا ہے، جو صارفین کو ہیکرز کا ہدف بننے والے اکاؤنٹ واپس حاصل کرنے میں مدد فراہم کرے گا۔گوگل سپورٹ پیج نے اسے ٹربل شوٹنگ ٹول قرار دیا ہے۔اس چیٹ بوٹ تک رسائی یوٹیوب ہیلپ سینٹر کے ذریعے ممکن ہوگی اور اس کی جانب سے ہیک ہونیوالے اکاؤنٹس کے صارف سے مختلف سوالات پوچھے جائیں گے، تاکہ وہ اپنے یوٹیوب چینلز میں کی جانیوالی تبدیلیوں کو ریورس کرسکیں۔
یہ اے آئی اسسٹنٹ ابھی صرف انگریزی زبان میں دستیاب ہے اور محدود صارفین کو اس تک رسائی حاصل ہے،مگر گوگل کے مطابق بتدریج اس فیچر کو تمام یوٹیوب صارفین کیلئے متعارف کرا دیا جائے گا۔