دشمن کی ہر کارروائی کا بھرپور اور طویل جواب دینے کی صلاحیت رکھتےہیں،کمانڈرایرانی پاسدارانِ انقلاب

ایران کے ایک اعلیٰ فوجی عہدیدار نے امریکا کو خبردار کیا ہے کہ اگر کسی بھی قسم کی مزید فوجی کارروائی کی گئی تو اس کا جواب طویل اور انتہائی سخت انداز میں دیا جائے گا۔
ایران کی پاسدارانِ انقلاب کے ایرو اسپیس کمانڈر میجر جنرل مجید موسوی نے کہا کہ اگر امریکا نے دوبارہ حملوں کا سلسلہ شروع کیا تو خطے میں موجود اس کے فوجی اڈے اور جنگی طیارے ایران کے نشانے پر ہوں گے۔
ان کا کہنا تھا کہ امریکا پہلے ہی اپنے اڈوں پر حملوں کے نتائج دیکھ چکا ہے، اور اگر کشیدگی میں اضافہ ہوا تو اس کے بحری جہاز بھی محفوظ نہیں رہیں گے۔
انہوں نے مزید کہا کہ ایران دشمن کی ہر کارروائی کا بھرپور اور طویل جواب دینے کی صلاحیت رکھتا ہے۔
یہ بیان ایسے وقت میں سامنے آیا ہے جب امریکا آبنائے ہرمز کو کھلا رکھنے کے لیے عالمی اتحاد تشکیل دینے کی کوشش کر رہا ہے، تاہم ایران کے سخت مؤقف نے اس عمل کو مزید پیچیدہ بنا دیا ہے۔
دوسری جانب ڈونلڈ ٹرمپ کو ایران کے خلاف ممکنہ نئی فوجی کارروائیوں کے منصوبوں پر بریفنگ دیے جانے کی اطلاعات ہیں، جن میں محدود مگر مؤثر حملوں کے آپشنز زیر غور ہیں۔