پاکستان ایک ذمہ دار ملک ہے، اپنے دفاع میں کارروائی کی،عطاتارڑ

وفاقی وزیراطلاعات ونشریات عطااللہ تارڑنےکہاہےکہ پاکستان ایک ذمہ دار ملک ہے، اپنے دفاع کا حق استعمال کرتے ہوئے کارروائی کی۔
غیرملکی میڈیاسےگفتگوکرتےہوئےوفاقی وزیراطلاعات ونشریات عطااللہ تارڑ کا کہناتھاکہ بھارت نے ہی پہل کی اور اسی کو پیچھے ہٹنا پڑے گا۔سول آبادی کو نشانہ بنانے کا بھارتی الزام مسترد کرتے ہیں، ہم نے اپنے دفاع کا حق استعمال کرتے ہوئے کارروائی کی، ہم نے صرف بھارت کی فوجی تنصیبات کو نشانہ بنایا ، بھارت نے امرتسر کو خود نشانہ بنایا۔
عطااللہ تارڑ کامزیدکہناتھاکہ پاکستان ایک ذمہ دار ملک ہے، بھارت نے پاکستان میں سویلینز آبادی کو نشانہ بنایا، پاکستان نے اقوام متحدہ کے چارٹر کے مطابق جوابی کارروائی کی، ہم نے بھارت میں کسی شہری آبادی کو نشانہ نہیں بنایا۔ ہم پر حملے کئے گئے جس کا ہم نے جواب دیا ہے، پاکستان نے ہر ممکن ضبط اور تحمل کا مظاہرہ کیا، ہم صرف اپنا دفاع اوربھارت جارحیت کا مظاہرہ کر رہا ہے۔
وفاقی وزیر کاکہناتھاکہ پہلگام پاکستانی سرحد سے دو سو کلو میٹر سے زائد فاصلے پر واقع ہے، پہلگام واقعہ میں پاکستان کے ملوث ہونے کے کوئی شواہد موجود نہیں ہیں، کسی بھی دہشتگردگروپ نے پہلگام حملے کی ذمہ داری قبول نہیں کی، ہم نے پہلگام واقعہ کیلئے شفاف اور مشترکہ تحقیقات میں تعاون کی پیشکش کی تھی۔ بھارت نے واقعہ کے صرف دس منٹ بعد ایف آئی آر درج کر کے پہلگام واقعہ کو مشکوک بنایا۔