کسی کو پاکستان کی خود مختاری، علاقائی سالمیت اور عزم کو آزمانے کی اجازت نہیں دینگے،فیلڈ مارشل

چیف آف ڈیفنس فورسز فیلڈ مارشل سید عاصم منیرنےکہاہےکہ کسی کو بھی پاکستان کی خود مختاری، علاقائی سالمیت اور عزم کو آزمانے کی اجازت نہیں دیں گے۔
چیف آف ڈیفنس فورسز فیلڈ مارشل سید عاصم منیر کا تینوں مسلح افواج کے افسران سے خطاب کرتے ہوئے کہنا تھا کہ نئے قائم ہونے والے ڈیفنس فورسز ہیڈ کوارٹرز میں کی گئی بنیادی تبدیلی تاریخی اہمیت رکھتی ہے۔ ڈیفنس فورسز ہیڈ کوارٹرز کا قیام اس بڑی تبدیلی کی جانب ایک ناگزیر قدم ہے۔
فیلڈ مارشل عاصم منیر کا کہنا تھا ہر سروس اپنی آپریشنل تیاریوں کیلئے اپنی انفرادیت برقرار رکھے گی، ڈیفنس فورسز کا ہیڈکوارٹر سروسز کے آپریشن کو مربوط اور ہم آہنگ کرے گا، بالاکمانڈکی یکجہتی کے ساتھ تینوں افواج اپنی اندرونی خودمختاری، تنظیمی ڈھانچہ برقراررکھیں گی۔ ضروری ہے ہم ملٹی ڈومین آپریشنز کو تینوں افواج کے متحد نظام کے تحت مزید بہتر کریں، بڑھتے اور بدلتے خطرات کے پیش نظر ایسا کرنا ضروری ہے۔
اُن کامزیدکہناتھاکہ طالبان کے پاس خوارج یا پاکستان میں سے کسی ایک کے انتخاب کےعلاوہ کوئی آپشن نہیں۔ بھارت کسی خود فریبی یا گمان کا شکار نہ رہے ، اگلی بار پاکستان کا جواب اس سےبھی برق رفتار اور شدید ہوگا۔
چیف آف ڈیفنس فورسز کا کہنا تھا اس بات کا اعادہ کرتا ہوں کہ پاکستان ایک امن پسند ملک ہے، کسی کو بھی پاکستان کی خود مختاری، علاقائی سالمیت اور عزم کو آزمانے کی اجازت نہیں دیں گے، تمام یہ جان لیں پاکستان کا تصور ناقابل تسخیر ہے، پاکستان کی حفاظت ایمان سے سرشار جانبازوں اور متحد قوم کے پختہ عزم نے کر رکھی ہے۔