واٹس ایپ کا نئے سال کو خوش آمدید کہنے کیلئے خصوصی فیچر متعارف

واٹس ایپ صارفین کیلئے خوشخبری ،واٹس ایپ کا نئے سال کو خوش آمدید کہنے کیلئے خصوصی فیچر متعارف،نیا سال 2026 قریب آتے ہی دنیا کی مقبول ترین انسٹنٹ میسیجنگ ایپ واٹس ایپ نے صارفین کیلئے ایک دلچسپ اور منفرد فیچر متعارف کروانا شروع کر دیا ہے ۔
واٹس ایپ کے منتخب بیٹا صارفین کو ایک خصوصی اینیمیٹڈ سٹیکر 2026 تک رسائی مل گئی ہے، جو نئے سال کی خوشیوں کو مزید رنگین بنا دے گا۔یہ اینیمیٹڈ سٹیکر دراصل نئے سال کے تھیم پر مبنی ایک مکمل سٹیکر پیک کا حصہ ہے، جس میں مختلف تہواروں سے متعلق ڈیزائن، مبارکباد کے پیغامات اور دلکش اینیمیشنز شامل ہیں۔ ان تمام سٹیکرز کو لوٹی فریم ورک کے ذریعے تیار کیا گیا ہے، جس کی بدولت اینیمیشنز نہایت ہموار، معیاری اور ہلکی ہوتی ہیں، جس سے ایپ کی کارکردگی متاثر نہیں ہوتی،جن صارفین کو یہ سٹیکر دستیاب ہوگا، وہ اسے پرائیویٹ چیٹس، گروپ چیٹس، چینلز اور سٹیٹس اپ ڈیٹس میں استعمال کر سکیں گے۔
اس سے نئے سال کے پیغامات مزید دلچسپ اور بصری طور پر پرکشش بن جائیں گے۔میٹا کی زیر ملکیت اس میسجنگ ایپ نے 2026 کے سٹیکر کو تلاش کرنا بھی آسان بنا دیا ہے۔ سٹیٹس لے آؤٹ سیکشن میں ایک اینیمیٹڈ ‘2026’ آئیکن دکھائی دے گا، جو صارفین کو نئے سال کے خصوصی لے آؤٹس کی طرف رہنمائی کرے گا۔
فی الحال یہ نیا فیچر منتخب بیٹا صارفین کیلئے دستیاب ہے، تاہم جن صارفین کو یہ سہولت ابھی نہیں ملی، انہیں مشورہ دیا گیا ہے کہ وہ اپنی واٹس ایپ کو تازہ ترین ورژن پر اپ ڈیٹ رکھیں۔
واٹس ایپ مسلسل صارفین کے تجربے کو بہتر بنانے کیلئے نئے اور جدید فیچرز متعارف کروا رہا ہے اور آئندہ دنوں میں مزید تخلیقی اور انٹرایکٹو اپ ڈیٹس کی توقع کی جا رہی ہے۔