حج کے دوران منیٰ میں روح پرور مناظر دیکھنے میں آئے جبکہ فضا “اللّٰھم لبیک” کی صداؤں سے گونجتی رہی۔
پاکستان سمیت دنیا بھر سے آئے ہوئے عازمین حج نے یومِ ترویہ منیٰ میں عبادات اور دعاؤں میں گزارا۔ شدید گرمی کے باعث حجاج نے دن کا بیشتر حصہ خیموں میں قیام کیا جبکہ شام کے وقت موسم بہتر ہونے پر منیٰ کی سڑکوں پر دوبارہ رونق بڑھ گئی۔
حکام کے مطابق تقریباً 20 لاکھ عازمین اس وقت مناسک حج کی ادائیگی کے لیے منیٰ میں موجود ہیں، جہاں انہوں نے ظہر اور عصر کی نمازیں بھی ادا کیں۔
ترجمان مذہبی امور کے مطابق عازمین رات کے کھانے کے بعد میدان عرفات روانگی کی تیاری کریں گے، جبکہ کل صبح ظہر سے قبل تمام حجاج عرفات پہنچ جائیں گے۔
حکام نے بتایا کہ وقوفِ عرفات حج کا رکنِ اعظم ہے، جہاں مسجد نمرہ سے خطبہ دیا جائے گا اور حجاج ظہر و عصر کی نمازیں اکٹھی ادا کریں گے۔ غروبِ آفتاب تک عرفات میں دعا، استغفار اور عبادات کا سلسلہ جاری رہے گا۔
بعد ازاں حجاج مغرب کے وقت مزدلفہ روانہ ہوں گے جہاں وہ کھلے آسمان تلے رات گزاریں گے اور رمی جمرات کے لیے کنکریاں جمع کریں گے۔
10 ذوالحجہ کی صبح حجاج منیٰ واپس آ کر رمی، قربانی، حلق اور طوافِ زیارت جیسے مناسک ادا کریں گے، جس کے بعد حج کے دیگر مراحل مکمل کیے جائیں گے۔
12 ذوالحجہ تک منیٰ میں رمی کا عمل جاری رہے گا اور مقررہ وقت پر حجاج منیٰ سے روانہ ہو جائیں گے، جس کے ساتھ حج کے مناسک اختتام پذیر ہوں گے۔
