ماضی کے تجربات سے سیکھا، اب بہتر حکمتِ عملی کے ساتھ ٹیم کو لیڈ کروں گا،کپتان بابر اعظم

پاکستان ٹیسٹ ٹیم کے کپتان بابر اعظم نے کہا ہے کہ وہ ایک بار پھر ٹیسٹ ٹیم کی قیادت سنبھالنے پر انتہائی پرامید اور پہلے سے زیادہ بہتر تیار ہیں۔

ایک انٹرویو میں بات کرتے ہوئے انہوں نے واضح کیا کہ اس بار ان کی پوری توجہ کھلاڑیوں کے ڈسپلن، فٹنس اور بہترین کارکردگی پر رہے گی۔ بابر اعظم کا کہنا تھا کہ پاکستان ٹیم کی کپتانی کرنا ہمیشہ ایک بہت بڑا اعزاز ہوتا ہے۔

ماضی میں کپتان اور بطور کھلاڑی کھیلنے کے تجربات سے بہت کچھ سیکھا ہے، جس سے وقت کے ساتھ ساتھ ان کی سوچ میں پختگی اور صفائی آئی ہے۔ وہ پرعزم ہیں کہ اس بار بہترین حکمتِ عملی اور مثبت سوچ کے ساتھ ٹیم کو کامیابی کی طرف لے کر جائیں گے۔

اپنی پرانی کپتانی کا جائزہ لیتے ہوئے انہوں نے اعتراف کیا کہ انسان سے اچھے اور برے دونوں طرح کے فیصلے ہوتے ہیں، لیکن انہوں نے اپنی ماضی کی غلطیوں کا گہرائی سے جائزہ لے کر اپنے ذہن کو ایک نئے اور مثبت انداز میں تیار کیا ہے۔