بانی پی ٹی آئی سےجیل میں ملاقات نہ کرانےپرعدالت میں درخواست دائر

بانی پی ٹی آئی عمران خان کےساتھ اڈیالہ جیل میں وکلاکی ملاقات نہ کرانے پر توہین عدالت کی درخواست اسلام آبادہائیکورٹ میں دائر کردی گئی۔
اسلام آباد ہائیکورٹ کی جسٹس ثمن رفعت امتیاز نےدرخواست پر سماعت کی۔
تحریک انصاف کےوکیل انتظار پنجوتھہ ایڈووکیٹ نے درخواست میں سیکرٹری داخلہ اور سپریٹنڈنٹ اڈیالہ جیل کو فریق بنا رکھا ہے۔
جسٹس ثمن رفعت امتیازنےکہاکہ اس کیس میں دیے گئے عدالتی آرڈر کی کوئی خلاف ورزی نہیں کی گئی، ہائیکورٹ کے دو رکنی بنچ نے ایس او پیز بنانے کی ڈائریکشن دی تھی، اگر خلاف ورزی ہوئی ہے تو توہینِ عدالت کی درخواست اُس بنچ میں ہو گی، میرے خیال میں توہینِ عدالت کی درخواست اس کیس میں نہیں بنتی، میں نوٹس جاری کر دیتی ہوں لیکن میں مطمئن نہیں ہوں۔
اسلام آباد ہائیکورٹ نے سیکرٹری داخلہ اور سپریٹنڈنٹ اڈیالہ جیل کو نوٹس جاری کر دیا۔