فن لینڈ: مشہور فضائی کمپنی فِن ایئر نے 8 طیارے گراؤنڈ کر دیے

فضائی مسافروں کیلئے اہم خبر،فن لینڈ کی فِن ایئر لائن نے 8 طیارے گراؤنڈ کر دئیے ۔ فضائی کمپنی فِن ایئر لائن نے محض ایک خدشے کے پیش نظر 8 پروازوں کو منسوخ اور تاخیر کرکے انہیں گراؤنڈ کردیا۔
رپورٹ کے مطابق فن لینڈ کی مشہور فضائی کمپنی فِن ایئر نے ایک غیر معمولی حفاظتی مسئلے کے باعث اپنی متعدد پروازیں عارضی طور پر منسوخ اور ملتوی کر دی ہیں۔فضائی کمپنی کے اس اقدام کی وجہ سے تقریباً 10 ہزار مسافر متاثر ہوئے ہیں، ائیر لائن نے جس بنیاد پر اپنے 8مسافر طیارے گراؤنڈ کیے وہ بظاہر معمولی ہے لیکن حیران کن ہے۔
ترجمان فِن ایئر لائن کے مطابق اس نے اپنے 8 اے 321 طیاروں کو گراؤنڈ کر دیا ہے، کیونکہ ان کی نشستوں کے کور غلط طریقے سے صاف کیے گئے تھے۔
فضائی کمپنی کے بیان کے مطابق نشستوں کی صفائی کیلئے استعمال ہونیوالا واٹر واشنگ طریقہ کار آتشزدگی سے متعلق حفاظتی معیار پر پورا نہیں اترتا۔
ایئرلائن ترجمان نے تمام متاثرہ مسافروں کو مطلع کیا ہے کہ منسوخ یا اووربُک پروازوں کے مسافروں کو ایس ایم ایس یا ای میل کے ذریعے مطلع کیا جائے گا اور مسافروں کو مشورہ دیا گیا ہے کہ وہ اپنی تازہ ترین رابطہ معلومات اپ ڈیٹ رکھیں۔
ترجمان فن ایئرلائن نے متاثرہ مسافروں کو یقین دہانی کرائی کہ مسافروں کی سلامتی ہماری اوّلین ترجیح ہے اور کمپنی ہمیشہ مینوفیکچررز اور متعلقہ حکام کی ہدایات کے مطابق کام کرتی ہے۔