ایڈیشنل آئی جی کراچی آزاد خان نے کہا ہے کہ ڈرگ ڈیلر انمول عرف پنکی کا نیٹ ورک وسیع ہے اور اس میں غیر ملکی عناصر بھی شامل ہیں۔ ان کے مطابق کچھ افریقی باشندے لاہور میں موجود ہیں جبکہ ملزمہ کا نیٹ ورک مختلف شہروں تک پھیلا ہوا ہے۔
کراچی میں پریس کانفرنس کے دوران آزاد خان نے بتایا کہ منشیات کی سپلائی میں رائیڈرز اور خواتین بھی ملوث ہیں۔ انمول پنکی کے فون کا فرانزک کیا گیا جس میں 869 نمبرز سامنے آئے، جن میں سے 132 کراچی کے ہیں۔ مزید 4 افراد کے نام ای سی ایل میں ڈالنے کی تیاری کی جا رہی ہے۔
انہوں نے کہا کہ انمول پنکی کے خلاف سندھ میں 20 کیسز درج ہیں جبکہ 9 مقدمات میں گرفتاری عمل میں لائی گئی ہے۔ پیشی کے دوران ایس او پیز کی خلاف ورزی پر 3 اہلکاروں کو معطل بھی کیا گیا ہے۔
پولیس کے مطابق ملزمہ کے ساتھیوں کی لوکیشن ٹریس کی جا رہی ہے اور مختلف اداروں سے رابطہ جاری ہے۔ ایڈیشنل آئی جی نے کہا کہ انمول پنکی کا نیٹ ورک اس کے لیے ہی نقصان کا باعث بنے گا۔
دوسری جانب کراچی پولیس نے ابوالحسن اصفہانی روڈ پر کارروائی کرتے ہوئے ملزمہ کے فلیٹ سے لاکھوں روپے مالیت کی کوکین برآمد کی ہے جبکہ دو مزید ملزمان کو بھی گرفتار کر لیا گیا ہے۔
