توشہ خانہ ٹوکیس:پراسیکیوشن نےدلائل کیلئے وقت مانگ لیا

توشہ خانہ ٹوکیس میں پراسیکیوشن نے دلائل کے لیے عدالت سے مزید وقت مانگ لیا۔
اڈیالہ جیل میں بانی پی ٹی آئی اوربشریٰ بی بی کی توشہ خانہ ٹوکیس میں ضمانت کی درخواستوں پرسماعت ہوئی۔سپیشل جج سینٹرل شاہ رخ ارجمندنے ضمانت بعد از گرفتاری کی درخواستوں پر سماعت کی ۔بانی پی ٹی آئی اوربشریٰ بی بی کوکمرہ عدالت میں پیش کیاگیا۔عمران خان اوربشریٰ بی بی کےوکیل سلمان صفدرعدالت میں پیش ہوئے۔
وکیل سلمان صفدرنےضمانت بعد از گرفتاری کی درخواستوں پر اپنے دلائل مکمل کر لیے ،پراسیکیوشن ٹیم کے ضمانت کی درخواستوں پر دلائل مکمل نہ ہو سکے ۔
پراسیکیوشن نےاستدعاکی کےدلائل کےلئے مزیدوقت دیاجائے۔
وکلاصفائی نےدلائل کےلئے پراسیکیوشن کومزیدوقت دینےکی استدعاکی مخالفت کی۔
وکیل سلمان صفدرنےکہاکہ عدالت ضمانت کی درخواستوں پر آج ہی فیصلہ کرے ، اگر کچھ نہیں ہونا تو عدالت ہماری ضمانت کی درخواستیں خارج کر دے۔ سماعت کی آج کی تاریخ بھی پراسیکوشن کی مرضی سے دی گئی تھی ۔اب کیا ہر کام پراسیکوشن کی مرضی سے ہوگا ۔
بانی پی ٹی آئی اوربشریٰ بی بی نےاستدعاکی کہ عدالت آج ہی ضمانت کی درخواستوں پرفیصلہ کرے۔
بانی پی ٹی آئی نےکہاکہ ہم انصاف چاہتے ہیں جو ہو رہا ہے یہ انصاف نہیں ،الیکشن سے پہلے پانچ دنوں میں تین سزائیں سنا دی گئیں ۔ بشریٰ بی بی کا اس کیس سے کچھ لینا دینا نہیں پھر بھی جیل میں ہے ، ہم 22 گھنٹے جیل کے دڑبے میں گزارتے ہیں ، عدالت ضمانت کی درخواستوں پر آج ہی فیصلہ کرے ۔
عدالت نے پروسیکیوشن کودلائل کے لیے مزید وقت دیتے ہوئے کیس کی سماعت 28 ستمبر تک ملتوی کر دی۔
عدالت نے توشہ خانہ ٹو کیس میں بانی پی ٹی آئی اور بشریٰ بی بی پر فرد جرم عائد کرنے کی تاریخ بھی مقرر کر دی۔توشہ خانہ ٹو کیس میں 2 اکتوبر کو بانی پی ٹی آئی اور بشریٰ بی بی پر فرد جرم عائد کی جائے گی۔