معین اخترکو مداحوں سے بچھڑے 13برس بیت گئے

پاکستان ٹوڈے: مزاح کے بے تاج بادشاہ معین اخترکو مداحوں سے بچھڑے 13برس بیت گئے۔

تفصیلات کے مطابق چہروں پر مسکراہٹیں بکھیرنے والا فنکار اپنے مداحوں کو ہنساتے ہنساتے رلا کے چلا گیا۔ سٹیج، ٹیلی وی اور تھیٹر کے مایہ ناز اداکار معین اختر22 اپریل2011کو حرکت قلب بند ہونے کے سبب کراچی میں انتقال کر گئے۔ وہ اپنی فنکاری سے تقریباً چار دہائیوں تک لوگوں کے چہروں پر قہقہے بکھیرتے رہے۔

انہوں نے جہاں لوزٹاک، ففٹی ففٹی، شو ٹائم اوریس سر نو سر جیسے کامیاب مزاحیہ ٹی وی شو کیے، وہیںروزی، سچ مچ، ہاف پلیٹ، ڈالرمین اور عید ٹرین سمیت متعد د ڈراما سیریلز میں بھی اداکاری کے جوہر دکھائے۔ ان کی فنی خدمات کے اعتراف میں انہیں تمغہ برائے حسن کارکردگی اور ستارہ امتیاز عطا کیا گیا۔

معین اختر 24 دسمبر 1950 کو کراچی میں پیدا ہوئے، زندگی کی پہلی پرفارمنس شیکسپیئر کے ناول سے ماخوذ سٹیج ڈرامے ’’دی مرچنٹ آف وینس‘‘ میں محض 13 برس کی عمر میں کی، جبکہ فنی کیرئیر کی باقاعدہ شروعات پاکستان کے پہلے یوم دفاع پر 1966 میں کی۔

لیجنڈ اداکار معین اختر کو فن کی اکیڈمی کہا جاتا تھا، کیونکہ فلم ہو یا ٹی وی یا پھرسٹیج ڈراما، انہوں نے ہر شعبے میں اپنی خداداد صلاحیتوں کا لوہا منوایا ۔ معین اختر کے طنز ومزاح سے بھرپور جملوں نے تہذیب کا ایک نیا پہلو متعارف کروایا۔