پاکستان نے خلاء کی وسعتوں کی تحقیق میں ایک اہم سنگ ِ میل عبور کر لیا

پاکستان نے خلاء کی وسعتوں کی تحقیق میں ایک اہم سنگ ِ میل عبور کر لیا۔سپارکو نے چینی خلائی ادارے کے ساتھ تاریخی مفاہمتی یادداشت (ایم او یو) پر دستخط کرکے خلائی تحقیق میں باضابطہ قدم رکھ دیا۔
پاکستان کے خلائی ادارے سپیس اینڈ اپر ایٹماسفیئر ریسرچ کمیشن (سپارکو) نے چائنا نیشنل سپیس ایڈمنسٹریشن (سی این ایس اے) کے ساتھ ایک تاریخی مفاہمتی یادداشت پر دستخط کرکے باقاعدہ خلائی تحقیق کا آغاز کر دیا ہے۔
دونوں ممالک کے درمیان یہ معاہدہ دو روز قبل5 فروری کو صدرِ پاکستان آصف علی زرداری اور چینی صدر شی جن پنگ کی موجودگی میں طے پایا۔یہ اہم معاہدہ پاکستان کے پہلے مقامی طور پر تیار کردہ قمری روور کی چین کے چینگ ای-8 مشن میں شمولیت کی راہ ہموار کرتا ہے، جو 2028 میں خلاء میں روانہ ہوگا۔
چینگ ای-8 مشن ،جوسی این ایس اے کے ذریعے تیار اور نافذ کیا گیا ہے، کا مقصد خودکار سائنسی تحقیق، ٹیکنالوجی کی جانچ، چاند کی سطح کی نقشہ سازی اور وسائل کے استعمال کی تحقیق کرنا ہے۔پاکستان کی اس مشن میں شمولیت اس کے خلائی پروگرام میں ایک اہم سنگ میل ہے۔
ترجمان سپارکو کے مطابق یہ انٹرنیشنل قمری ریسرچ سٹیشن آئی ایل آر ایس کے منصوبے میں پاکستان کی شراکت کو بھی اجاگر کرتا ہے۔