شوبز انڈسٹری کی معروف اداکارہ مومنہ اقبال کے نکاح کی تصدیق سامنے آ گئی ہے۔ حمزہ حبیب نے میڈیا سے گفتگو کرتے ہوئے بتایا کہ ان کا اور مومنہ اقبال کا نکاح چند روز قبل انجام پا چکا ہے۔
دوسری جانب لاہور ہائیکورٹ نے حمزہ حبیب کی حفاظتی ضمانت منظور کرتے ہوئے انہیں متعلقہ عدالت سے رجوع کرنے کی ہدایت جاری کی ہے۔
رپورٹس کے مطابق حمزہ حبیب کے خلاف جھنگ میں ایک مقدمہ درج ہے، جس میں انہیں دھمکیاں دینے کے الزام کا سامنا ہے۔ عدالت میں پیشی کے موقع پر انہوں نے مقدمے کو بے بنیاد قرار دیتے ہوئے الزامات کی تردید کی۔
میڈیا سے گفتگو میں حمزہ حبیب نے کہا کہ مومنہ اقبال ان کی قانونی اہلیہ ہیں اور وہ ان کی عزت کا باعث ہیں۔
انہوں نے مقدمے کے مدعی پر بھی الزامات عائد کرتے ہوئے مؤقف اختیار کیا کہ ان کے خلاف کیس ذاتی اور دیگر محرکات کی بنیاد پر بنایا گیا ہے۔ تاہم اس معاملے سے متعلق قانونی کارروائی جاری ہے۔
