ہمیں دباؤ ڈال کر خاموش نہیں کروایا جا سکتا دونوں بہنوں کو دھمکیاں دی جا رہی ہیں، مومنه اقبال

شوبز انڈسٹری کی معروف اداکارہ مومنہ اقبال نے کہا ہے کہ دباؤ، دھمکیوں یا منظم مہمات کے ذریعے انہیں خاموش نہیں کرایا جا سکتا اور وہ اپنے مؤقف پر ڈٹی رہیں گی۔

فوٹو اور ویڈیو شیئرنگ ایپ انسٹاگرام پر مومنہ اقبال نے اپنی بہن رمشا اقبال کی میڈیا سے گفتگو شیئر کرتے ہوئے لکھا کہ وہ اب صرف اپنے لیے نہیں بلکہ ہر اُس شخص کے لیے آواز اٹھا رہی ہیں جو ایسے مسائل کا سامنا کرتا ہے۔

اداکارہ نے کہا کہ کچھ عناصر کی جانب سے مسلسل دباؤ ڈالا جا رہا ہے، تاہم وہ اپنی جدوجہد جاری رکھیں گی۔ انہوں نے مزید لکھا کہ ان کے ساتھ جو کچھ ہو رہا ہے وہ انتہائی مشکل ضرور ہے، لیکن انہیں خاموش نہیں کرایا جا سکے گا۔

مومنہ اقبال نے کسی کا نام لیے بغیر کہا کہ پیسے دے کر چلائی جانے والی مہمات اور سوشل میڈیا پر مواد بنانے کے بجائے حقائق پر توجہ دی جائے اور جھوٹی قانونی کارروائیاں بند کی جائیں۔

دوسری جانب میڈیا سے گفتگو میں مومنہ اقبال کی بہن رمشا اقبال نے الزام عائد کیا کہ انہیں اور ان کی بہن کو ڈرایا دھمکایا جا رہا ہے۔

یاد رہے کہ اداکارہ مومنہ اقبال کو مبینہ طور پر ہراساں کرنے کے معاملے میں نیشنل سائبر کرائم انویسٹی گیشن ایجنسی نے رکن پنجاب اسمبلی ثاقب چدھڑ کے خلاف مقدمہ درج کر رکھا ہے۔

مومنہ اقبال حال ہی میں حمزہ حبیب کے ساتھ رشتۂ ازدواج میں منسلک ہوئی ہیں، جس کی تصاویر اور ویڈیوز سوشل میڈیا پر وائرل ہوئی تھیں۔