سائنسدانوں کی بڑی کامیابی، مٹی سے بجلی بنانے کی نئی ٹیکنالوجی متعارف کرا دی

بجلی کی بڑھتی ہوئی قیمتوں کے درمیان توانائی کے متبادل ذرائع کی تلاش جاری ہے، اور اب برطانوی ماہرین نے ایک ایسی نئی ٹیکنالوجی متعارف کرائی ہے جو مٹی سے بجلی پیدا کرنے کی صلاحیت رکھتی ہے۔

برطانیہ کی ایک ٹیکنالوجی کمپنی نے ایسا آلہ تیار کیا ہے جو زمین میں موجود قدرتی بیکٹیریا کی سرگرمی سے توانائی حاصل کرکے بجلی پیدا کرتا ہے۔

کمپنی کے مطابق یہ ڈیوائس مٹی میں نصب کی جاتی ہے اور وہاں موجود خردبینی جانداروں سے پیدا ہونے والی توانائی کو جمع کرکے قابلِ استعمال بجلی میں تبدیل کرتی ہے۔

اس منصوبے کے ذمہ دار ماہرین کا کہنا ہے کہ اس ٹیکنالوجی کی عملی آزمائش جاری ہے تاکہ مختلف اقسام کی مٹی میں اس کی کارکردگی کا جائزہ لیا جا سکے۔

کمپنی کے مطابق یہ نظام دن رات مسلسل توانائی پیدا کرنے کی صلاحیت رکھتا ہے اور مستقبل میں ماحول دوست توانائی کے دیگر ذرائع، جیسے سولر سسٹمز، کے ساتھ مل کر استعمال کیا جا سکتا ہے۔

ماہرین کا کہنا ہے کہ اگر یہ ٹیکنالوجی کامیاب ثابت ہوئی تو کم توانائی استعمال کرنے والے آلات کو طویل عرصے تک بجلی فراہم کرنے کا ایک نیا اور پائیدار ذریعہ بن سکتی ہے۔