انڈرگریجویٹ طلبا کیلئے انٹرن شپ اور سرٹیفکیشن لازمی قرار

طلبا و طالبات کیلئے اہم خبر، انڈرگریجویٹ طلبا کیلئے انٹرن شپ اور سرٹیفکیشن لازمی قرار،ہائیر ایجوکیشن کمیشن (ایچ ای سی) نے پاکستان میں انڈرگریجویٹ طلبا کیلئے انٹرن شپ اور انڈسٹری سے متعلقہ سرٹیفکیشن لازمی قرار دیدیا۔
ایچ ای سی کے تحت یہ نیا اقدام انڈرگریجویٹ ایجوکیشن پالیسی 2023 کا حصہ ہے، جس کا بنیادی مقصد تعلیم اور صنعت کے درمیان موجود فرق کو ختم کرنا اور گریجویٹس طلبا کی عملی مہارتوں کو بہتر بنا کر انہیں ملکی و بین الاقوامی جاب مارکیٹ میں زیادہ مسابقتی بنانا ہے۔
ایچ ای سی کے مطابق اکثر یونیورسٹیوں سے ڈگری حاصل کرنیوالے طلبا کے پاس عملی تجربہ نہیں ہوتا اور عملی میدان میں درکار ہنر اور تجربے سے محروم رہ جاتے ہیں۔
ایچ ای سی کے مطابق یہ فیصلہ پاکستان کی تمام سرکاری و نجی یونیورسٹیوں اور ڈگری ایوارڈنگ اداروں پر لاگو ہوگا، طلبا کو 3 کریڈٹ آورز پر مشتمل سپروائزڈ انٹرن شپ مکمل کرنا ضروری ہوگا، تاکہ وہ عملی ماحول میں کام کرنے کا تجربہ حاصل کر سکیں، اس کے علاوہ طلبا کیلئے آئی ٹی، فنانس، کنسٹرکشن، ہیلتھ اور دیگر اہم شعبوں میں انڈسٹری سرٹیفکیشن حاصل کرنا بھی ضروری ہوگا۔
ماہرین تعلیم کے مطابق یہ اقدام پاکستانی طلبا کیلئے ایک مثبت تبدیلی ثابت ہوگا، کیونکہ عالمی سطح پر گریجویٹس سے نا صرف تعلیمی قابلیت ،بلکہ عملی تجربہ اور تکنیکی مہارتوں کی توقع کی جاتی ہے۔