وفاقی حکومت کا خیبرپختونخوا کو گندم کی فراہمی کا فیصلہ

وزیراعظم شہباز شریف کی ہدایت پر وزارت فوڈ سیکیورٹی نے خیبرپختونخوا کو گندم کی فراہمی کا فیصلہ کر لیا ہے۔

تفصیلات کے مطابق وزیراعظم نے وزارت فوڈ سیکیورٹی کو پاسکو کے ذریعے گندم کی سپلائی یقینی بنانے کی ہدایت جاری کی ہے۔ وفاقی وزیر رانا تنویر حسین کے مطابق اس اقدام کا مقصد خیبرپختونخوا کے عوام کو مہنگائی کے اثرات سے محفوظ رکھنا ہے۔

انہوں نے کہا کہ پاسکو کے ذریعے فوری اور مؤثر گندم سپلائی کو یقینی بنایا جا رہا ہے، اور یہ فیصلہ غذائی تحفظ اور عوامی ریلیف کے لیے ایک عملی قدم ہے۔

حکومتی ذرائع کے مطابق اس اقدام سے صوبے میں گندم کی دستیابی بہتر ہونے اور ممکنہ قلت پر قابو پانے میں مدد ملے گی۔