تمام ممالک ایک ہی رفتار سے آگے نہیں بڑھ سکتے“،ترک صدر

ترک صدر رجب طیب اردوان نے اقوام متحدہ کی جنرل اسمبلی سے اپنے خطاب میں کہا کہ ایسی کوئی بھی تجویز جو موسمیاتی اہداف کو معاشرتی اور معاشی حقیقتوں سے ہم آہنگ نہ کرے، کامیاب نہیں ہوسکتی۔
ان کے مطابق ہر ملک کے حالات، وسائل اور ترقی کی ترجیحات مختلف ہیں، اس لیے تمام ممالک سے ایک ہی رفتار سے پیش رفت کی توقع کرنا حقیقت پسندانہ نہیں۔
ترک صدر نے کہا کہ موسمیاتی اقدامات کے لیے مالی وسائل اور جدید ٹیکنالوجی تک رسائی میں موجود عدم مساوات ایک اہم رکاوٹ ہے۔
جب تک یہ فرق برقرار رہے گا، تمام ممالک کے لیے موسمیاتی اہداف پر یکساں رفتار سے آگے بڑھنا ممکن نہیں ہوگا۔
اردوان نے اس بات پر زور دیا کہ موسمیاتی اہداف کو ترقی اور خوشحالی کے ساتھ جوڑنا ضروری ہے تاکہ ماحولیاتی تبدیلی سے نمٹنے کے اقدامات منصفانہ اور مؤثر بن سکیں۔ ترکیہ رواں سال نومبر میں انطالیہ میں COP31 موسمیاتی کانفرنس کی میزبانی کرے گا۔