برطانوی خبر رساں ادارے کی رپورٹ کے مطابق ایک وقت تھا جب اسرائیلی وزیراعظم بنیامین نیتن یاہو امریکا کو ایران کے خلاف اپنے مؤقف کی حمایت پر آمادہ کرنے میں کامیاب نظر آتے تھے، لیکن اب صورتحال تبدیل ہوتی دکھائی دے رہی ہے۔
رپورٹ میں کہا گیا ہے کہ ایران کے خلاف حالیہ کشیدگی کے دوران بنیامین نیتن یاہو خود کو ایک مضبوط رہنما کے طور پر پیش کر رہے تھے، تاہم اب امریکا ایران سے متعلق ممکنہ سفارتی پیش رفت کو زیادہ اہمیت دیتا دکھائی دے رہا ہے۔
رپورٹ کے مطابق اسرائیل کے اندر بھی نیتن یاہو کو سیاسی دباؤ کا سامنا ہے اور ان کے مخالفین انہیں مزید سیاسی گنجائش دینے کے لیے تیار نہیں۔
برطانوی میڈیا کا کہنا ہے کہ نیتن یاہو نے ایران کے خلاف کارروائیوں کو کامیابی قرار دیا، لیکن ناقدین کے مطابق وہ اپنے تمام مقاصد حاصل نہیں کر سکے۔ رپورٹ میں یہ بھی دعویٰ کیا گیا ہے کہ ایران اور امریکا کے درمیان ممکنہ مفاہمتی عمل سے بھی نیتن یاہو کو کوئی خاص سیاسی یا سفارتی فائدہ حاصل نہیں ہوا۔
رپورٹ کے مطابق ایران سے متعلق حالیہ پیش رفت کے بعد نیتن یاہو کو اندرونی اور بیرونی دونوں محاذوں پر نئے چیلنجز کا سامنا ہے۔
