منفردموسیقار اے حمید کومداحوں سے بچھڑے 34 برس بیت گئے

بے شمار سپر ہٹ گیتوں کے موسیقار  اے  حمید  کو مداحوں سے بچھڑے 34 برس بیت گئے۔
دلوں کو چھو جانے والی ان کی بنائی دھنیں آج بھی باذوق موسیقی سننے والوں میں مقبول ہیں۔ان کا اصل نام شیخ عبدالحمید تھا۔وہ 1934کوامرتسرمیں پیدا ہوئے، انہوں نے 1957 میں لالی وڈ کی فلم ’’انجام‘‘ سےاپنے فنی کیرئیر کا آغاز کیا اور فلم انڈسٹری کو کئی سپرہٹ گیت دئیے، جس میں اُن کاتخلیق کردہ مشہورگانا’’اب کے ہم بچھڑے تو شاید کبھی خوابوں میں ملیں ‘‘ ہے۔
فلم’’ توبہ‘‘ کی قوالی کا شمار سپر ہٹ قوالیوں میں ہوا۔اس کے علاوہ سہیلی، رات کے راہی، یہ امن، سوہنی مہینوال اور آواز جیسی درجنوں فلموں میں اے حمید کے تخلیق کردہ گیت آج بھی سننے والوں کو مسحور کر دیتے ہیں۔
خصوصاً ایک گیت تیری الفت میں صنم دل نے بہت درد سہے، نے بہت مقبولیت حاصل کی۔اے حمید نے اپنے کریئر میں 66 اردو اور پنجابی فلموں کی موسیقی ترتیب دی۔
منفرد موسیقار اے حمید 20 مئی 1991 کو راولپنڈی میں انتقال کر گئے ،مگر اپنے گیتوں کی صورت آج بھی مداحوں کے دلوں میں زندہ ہیں۔