پی ٹی آئی کااحتجاج:پنجاب میں بھی فوج طلب

تحریک انصاف کےاحتجاج کےپیش نظرحکومت نےصوبےمیں امن وامان برقراررکھنےکےلئےپاک فوج کوطلب کرلیا۔

نوٹیفکیشن کےمطابق پنجاب حکومت نے وفاقی حکومت سے فوج تعینات کرنے کی استدعا کر دی۔ صوبے کے 6 اضلاع میں پاک فوج کو طلب کیا گیا ہے۔ پاک فوج حساس عمارتوں، ائیرپورٹس سمیت اہم عمارتوں کا کنٹرول سنبھالے گی۔ محکمہ داخلہ پنجاب نے وفاق کو پاک فوج کی تعیناتی کے لیے خط لکھ دیا۔

پاک فوج کی خدمات طلب کرنے کا نوٹیفکیشن جی ایچ کیو ارسال کر دیا گیا، پنجاب کے تمام کور ہیڈکوارٹرز کو بھی نوٹیفکیشن کی کاپی بھجوا دی گئی۔
پنجاب حکومت کےجاری کردہ نوٹیفکیشن کےمطابق آئین کےآرٹیکل 245 کے تحت مسلح افواج کی تعیناتی پر عملدرآمد کرائیں گے۔

نوٹیفکیشن کے مطابق فوج طلبی کا فیصلہ کابینہ کمیٹی برائے امن و امان کے اجلاس میں کیا گیا، مسلح جتھوں کی جانب سے حملے کی معلومات پر آرمڈ فورسز کو کارروائی کا اختیار ہو گا، مسلح افواج کو انتشار پھیلانے والوں سے سختی سے نمٹنے کا اختیار ہو گا۔
نوٹیفکیشن میں مزیدکہاگیاہےکہ پولیس کی عدم موجودگی میں مسلح افواج جرم روکنے کے لیے کسی بھی شخص کو تحویل میں لے سکیں گی۔ رولز کے تحت آرمڈ فورسز کو انسداد دہشت گردی ایکٹ کے سیکشن پانچ کے اختیارات حاصل ہوں گے۔