چین نے سیاحوں کو بغیر ویزا داخلے کی اجازت دیدی

پاکستان ٹوڈے: چین جانے کے خواہشمند سیاحوں کیلئے بڑی خوشخبری ۔

تفصیلات کے مطابق چینی حکام نے سیاحوں کو بغیر ویزا داخلے کی اجازت دیدی۔ چین نے معاشی طور پر خود کو مزید مستحکم کرنے کیلئے مختلف طریقوں پر عمل شروع کر دیا، جس کے تحت چینی حکام نے غیر ملکی سیاحوں کو بغیر ویزا داخلے کی اجازت دیدی ہے۔

چین نے ملک کی ساحلی پٹی کے تمام بندرگاہوں پر کروز بحری جہازوں کے ذریعے آنے والے غیر ملکی سیاحوں کے گروپس کو ویزا کے بغیر داخلے کی اجازت دینے کی پالیسی کا اعلان کر دیا۔ چینی امیگریشن انتظامیہ کے مطابق ایسے سیاحوں کے گروپ جو 2یا 2سے زیادہ غیر ملکیوں پر مشتمل ہیں اور چینی ٹریول ایجنسیوں کے ذریعے چین میں آئے ہیں، انہیں چین کے 13 شہروں بشمول شنگھائی، تیان جن، گوانگ ژو، سانیا اور دیگر میں کروز بندرگاہوں کے ذریعے بغیر ویزا داخلے کی اجازت ہو گی۔

تاہم بغیر ویزا داخل ہونے والے سیاح چین میں 15 دن سے زیادہ نہیں ٹھہر سکیں گے، دوران قیام وہ ساحلی صوبوں، میونسپلٹیز اور خود مختار علاقوں کے ساتھ بیجنگ بھی جا سکیں گے۔این آئی اے نے 7 کروز بندرگاہوں ڈالیان، لیان یون گانگ، وین ژو، ژوشان، گوانگ ژو، شین ژن، اور بی ہائی کو 54 ممالک کے شہریوں کے لیے ویزا فری ٹرانزٹ بندرگاہوں کے طور پر نامزد کیا ہے۔

یہ سہولت چین کی ویزا فری ٹرانزٹ پالیسی کے تحت کروز بحری جہازوں کے ذریعے ان بندرگاہوں سے غیر ملکی مسافروں اور سیاحوں کی آمدورفت اور روانگی کیلئے متعارف کروائی گئی ہے۔