گوگل کی جانب سے نیا اینڈرائیڈ 16 آپریٹنگ سسٹم متعارف

گوگل صارفین کیلئے خوشخبری،معروف ٹیکنالوجی کمپنی نے نئے اینڈرائیڈ 16 آپریٹنگ سسٹم کو متعارف کرا دیا۔
گوگل نے اینڈرائیڈ 16 آپریٹنگ سسٹم کو عام صارفین کیلئے متعارف کروا دیا ہے اور یہ اب مخصوص سمارٹ فونز میں دستیاب ہے۔
کمپنی کے مطابق ایسی نئی ڈیوائسز آنیوالے مہینوں میں دستیاب ہوں گی، جن میں یہ نیا آپریٹنگ سسٹم پہلے سے لوڈ ہوگا۔یہ سب سے پہلے گوگل کے پکسل فونز کو دستیاب ہوگا۔یہ پہلی بار ہے کہ جب گوگل کی جانب سے نئے آپریٹنگ سسٹم کو جون میں متعارف کرایا گیا ہے، عموماً کمپنی کی جانب سے نیا ورژن ستمبر یا اکتوبر میں جاری کیا جاتا ہے۔اس نئے آپریٹنگ سسٹم میں متعدد نئے فیچرز کا اضافہ کیا گیا ہے، جیسے لائیو اپ ڈیٹس، جس کے ذریعے آپ رائیڈ شیئرنگ گاڑیوں اور فوڈ ڈیلیوریز کو نوٹیفکیشنز میں ٹریک کر سکیں گے،اسی طرح نئے ڈیوائس سکیورٹی فیچرز اور دیگر متعدد اپ ڈیٹس کی گئی ہیں۔
نئے آپریٹنگ سسٹم کے چند اہم فیچرز کے مطابق اگر آپ فوڈ ڈیلیوری کے منتظر ہیں یا رائیڈ شیئرنگ سواری کا انتظار کر رہے ہیں، تو آپ کے فون کی لاک سکرین پر ہی لائیو اپ ڈیٹس کو دیکھنا ممکن ہو جائے گا۔کمپنی کی جانب سے اینڈرائیڈ 16 کیلئے ڈیسک ٹاپ ونڈونگ ٹو اینڈرائیڈ نامی فیچر بھی متعارف کرایا ہے، جو آنیوالے مہینوں میں صارفین کو دستیاب ہوگا۔