پاکستان اور چین کے درمیان سفارتی تعلقات کے 75 برس مکمل ہونے کے موقع پر خصوصی یادگاری سکے کا ڈیزائن جاری کر دیا گیا۔
سکے کے اگلے حصے کے وسط میں ابھرتے ہوئے انداز میں ہلال اور پانچ کونوں والا ستارہ دکھایا گیا ہے۔ اس کے اوپری کنارے پر اردو رسم الخط میں “اسلامی جمہوریہ پاکستان” تحریر ہے۔ ہلال کے نیچے گندم کی دو خوشوں کے درمیان 2026 کا سال درج کیا گیا ہے۔ سکے کی مالیت 75 ہندسے کی صورت میں نمایاں ہے جبکہ دوسری جانب اردو میں “روپیہ” لکھا گیا ہے۔
سکے کے پچھلے حصے پر پاکستان اور چین کے سفارتی تعلقات کے 75 سال مکمل ہونے کی مناسبت سے خصوصی نقش و نگار شامل کیے گئے ہیں۔ اوپری حصے پر انگریزی میں “پاکستان اور چین کے سفارتی تعلقات کی 75ویں سالگرہ” جبکہ نچلے حصے میں “اعتماد، دوستی، تعاون” کے الفاظ درج ہیں۔
سکے کے مرکز میں اسلامی جمہوریہ پاکستان اور عوامی جمہوریہ چین کے قومی پرچم نمایاں کیے گئے ہیں۔ پرچموں کے نیچے خوبصورت انداز میں 75 کا ہندسہ بنایا گیا ہے جو اس تاریخی موقع کی علامت ہے، جبکہ اس کے اطراف میں 1951 اور 2026 کے سال درج کیے گئے ہیں۔
مزید برآں، قومی پرچموں کے اوپر اردو اور چینی زبان میں “پاک چین سفارتی تعلقات کے 75 سال” کی عبارت بھی شامل کی گئی ہے، جو دونوں ممالک کے دیرینہ اور مضبوط تعلقات کی عکاسی کرتی ہے۔
