سابق کپتان وسیم اکرم نے پاکستان ٹیم کی بنگلہ دیش کے ہاتھوں مسلسل دوسری شکست پر مایوسی کا اظہار کیا ہے، تاہم انہوں نے فاتح ٹیم کی شاندار کارکردگی کو سراہا ہے۔
وسیم اکرم کے مطابق بنگلہ دیش نے مکمل اور متوازن کرکٹ کھیلتے ہوئے پاکستان کو ہر شعبے میں پیچھے چھوڑ دیا۔
انہوں نے کہا کہ پہلے بنگلہ دیشی وکٹیں زیادہ تر سلو اور ٹرننگ ہوتی تھیں، لیکن اب وہاں ایسی ٹیسٹ پچز تیار کی جا رہی ہیں جو فاسٹ بولرز کے لیے بھی مددگار ثابت ہو رہی ہیں۔ ان کے مطابق اس تبدیلی نے بنگلہ دیش کے ابھرتے ہوئے پیس اٹیک کو مزید مضبوط بنا دیا ہے۔
وسیم اکرم نے مزید کہا کہ بنگلہ دیش کی ٹیم اب اس قابل ہو چکی ہے کہ وہ ٹیسٹ کرکٹ میں بڑی ٹیموں کا مقابلہ کر سکے۔
انہوں نے نوجوان فاسٹ بولر نہید رانا کی کارکردگی کو بھی سراہا اور کہا کہ وہ ایک بہترین ٹیلنٹ ہیں اور انہیں دیکھنا واقعی خوشی دیتا ہے۔
آخر میں سابق کپتان نے بنگلہ دیشی ٹیم کو شاندار فتح پر مبارکباد دی۔
